O‘zbekiston Respublikasi Prezidenti “Respublika sog‘liqni saqlash tizimini va aholiga tibbiy xizmat ko‘rsatish tamoyillarini takomillashtirish orqali sohani isloh qilishni izchil davom ettirish chora-tadbirlari to‘g‘risida” qaror qabul qildi.

Unga muvofiq, ilg‘or xorijiy tajriba asosida aholiga birlamchi tibbiy-sanitariya yordami ko‘rsatishning yangi tizimi joriy etiladi. Tizimning asosiy maqsadlari:

a) xalqaro tajribaga asoslangan aholiga birlamchi tibbiy-sanitariya yordami ko‘rsatishning yangi modelini joriy qilish; 

b) birlamchi tibbiy-sanitariya yordami muassasalari, xususan, tuman (shahar) ko‘p tarmoqli markaziy poliklinikalari, oilaviy shifokor punktlari va oilaviy poliklinikalar, mahalla tibbiyot punktlari faoliyatini yagona yondashuv asosida tashkil qilish orqali aholiga tibbiyotni yanada yaqinlashtirish; 

v) aholiga tibbiy yordam ko‘rsatishda oilaviy shifokor ulushini 70 foizga yetkazish; 

g) sog‘liqni saqlash tizimini raqamlashtirish hamda tibbiyotda qog‘ozbozlikni kamaytirish orqali tibbiyot xodimlari ish yuklamasini 30 foizgacha kamaytirish; 

d) aholining birlamchi tibbiy-sanitariya yordamidan roziligi darajasini 85 foizdan oshirish; 

ye) tibbiyot xodimlarini samaradorlikning eng muhim ko‘rsatkichlari asosida moddiy rag‘batlantirish tizimini joriy qilish; 

j) tibbiyot brigadalari xodimlarining bilim va ko‘nikmalarini oshirishdan iborat bo‘ladi. 

O‘zA