Бош прокуратура томонидан тиббиёт ходимлари фаолиятига тўсқинлик қилиш ва уларга нисбатан зўравонлик ҳолатларининг олдини олиш мақсадида қонун лойиҳаси ишлаб чиқилди.

“Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида”ги мазкур лойиҳа  жамоатчилик муҳокамасига тақдим этилди. 

Унга кўра, Маъмурий жавобгарлик тўғрисидаги кодексда тиббиёт ходимининг фаолиятига қонунга хилоф равишда аралашганлик учун жавобгарлик белгиланмоқда.  

Яъни, кодекс тиббиёт ходимининг тиббий ёрдам ёки тиббий хизмат кўрсатишига тўсқинлик қилганлик, худди шунингдек тиббиёт ходимининг тиббий ёрдам ёки тиббий хизмат кўрсатишига тўсқинлик қилиш мақсадида унга ноқонуний топшириқлар берганлик учун жавобгарликни назарда тутувчи янги модда билан тўлдирилмоқда. 

Шунингдек, Жиноят кодексига безорилик жиноятини ўз хизмат ёки фуқаролик бурчини бажариши муносабати билан шахсга ёки унинг яқин қариндошларига нисбатан содир этилиши, шу жумладан, тиббиёт ходимларига безорилик оқибатида тажовуз қилганлик учун жавобгарликни оғирлаштирилишини назарда тутувчи ўзгартиш киритилмоқда. 

Қонуннинг қабул қилиниши шифокорлик касбининг мақоми ва нуфузини ошириш, уларни ижтимоий-ҳуқуқий ҳимоясини янада кучайтиришга хизмат қилади.  

Хусусан, давлат томонидан тиббиёт ходимларини турли тажовузлардан ҳимоя қилиниши таъминланади. Фуқароларга ўз вақтида ва сифатли тиббий ёрдам кўрсатилади ҳамда тиббиёт ходимларининг касбий фаолиятига турлича аралашувларнинг олди олинади.  

ЎзА