Таиланднинг Бангкок шаҳрида ўтказилаётган “Thailand Open” халқаро турнирида ярим финал беллашувлари ўз якунига етди. Қувонарлиси, мазкур босқичда Ўзбекистон терма жамоасининг 9 нафар аъзоси финалга йўл олган бўлса, қолган 7 нафар чарм қўлқоп усталари бронза медалини қўлга киритди.

Жумладан, Шодиёржон Мелиқўзиев (-50 кг), Фарёзбек Дўсматов (-55 кг), Муҳаммадазизбек Исмоилов (-70 кг), Жавоҳир Абдураҳимов (-75 кг), Нусратбек Тоҳиров (-85 кг), Фарзона Фозилова (-48 кг), Сабина Бобоқулова (-51 кг), Феруза Казакова (-54 кг) ва Азиза Зокирова (-75 кг) каби боксчиларимиз финалга чиқди.

Шунингдек, Мадияр Данияров, Самандар Жалолов, Элёрбек Жўрабоев, Абдураҳмон Рустамов, Нигина Ўктамова, Навбаҳор Ҳамидова ҳамда Ойша Тоирова ўз вазн тоифаларида бронза медалига эга чиқди.

Жавоҳир Тошхўжаев, ЎзА