Бу саволларга “Milliy” телеканалида эфирга узатилган “Tez yordam” кўрсатувида тиббиёт фанлари номзоди, олий тоифали нефролог-шифокор Барно Алимуҳамедова қуйидагича жавоб берди:

– Мутахассисларнинг хулосасига кўра, коронавирус нафақат ўпка, одамнинг бошқа аъзоларини ҳам жароҳатлайди. Вирус таначалари мия тўқималарида, юрак-қон томирлари, жигар, ичак ва ҳатто буйракда ҳам топилган. Буйрак соҳасида касалликнинг кечиши енгил турда эмас, асосан ўрта оғир, оғир ва ўта оғир турларида намоён бўлади. 

Жонлантириш бўлимларида ётган беморларнинг 60 фоизида буйрак шикастланиши, хусусан, ўта оғир буйрак етишмовчилигини кузатишимиз мумкин ва бу, ўз навбатида, пешоб йўлларининг ҳам зарарланишига олиб келади. 

Маълумотларга кўра, АҚШ ва Хитой каби давлатларда ўткир буйрак етишмовчилигига учраган беморларнинг кўпчилигида гемодиализ усулида даволаниш учун бўлимларда жой қолмаган вақтлар ҳам бўлган. Беморда ўткир буйрак етишмовчилиги кузатилса, гемодиализ усули, яъни сунъий буйрак аппаратига қўйиш керак. Шу аппарат ўпка, юрак ва буйракка ёрдам беради. Ҳозирда шу усулдан фойдаланилмоқда. 

С витаминини айнан касалланган пайтда 1 ёки 2 граммдан ичиш мумкин. Лекин кейинчалик тўхтатиш лозим. Чунки С витамини буйрагида касаллиги бўлган одамда тош касалликларини ривожлантириб юборади. 

Буйрак касаллиги билан оғриган беморларга шомоллашга қарши бўлган айрим дори воситаларини ичиш ман этилади. Лекин коронавирусни даволашда шифокорлар бу дориларнинг баъзиларини қисман қўллашга мажбур бўлади. Ҳаттоки оддий парацетамол ёки ибупрофен ҳам буйракка салбий таъсир қилиши мумкин. Бу ерда одамнинг наслий мойиллиги, дорининг миқдори ва буйрак ишлашининг тезлиги ҳам аҳамиятга эга. 

Баъзида травматолог, ревматолог ҳамда невропатолог томонидан одамларда жуда қаттиқ оғриқ бўладиган бўлса ҳаттоки шу дориларнинг 2-3 хилини ҳам бериб юбориш ҳолатлари бўлади. Бу ҳолатларда адашмаслик учун бемор ҳар бир дорини мутахассис назоратидан ўтган ҳолда қабул қилиши лозим.