Өзбекстанның Ғылыми-сынақ және сапаны бақылау орталығы IQNet халықаралық сертификаттау желісінде қауымдастырылған мүше мәртебесіне ие болды.

Бұл туралы IQNet ұйымы тиісті қорытындысын жариялады.

Аталған мәртебе орталыққа IQNet қызметіне кеңінен қатысуға, халықаралық тәжірибе алмасуға және ынтымақтастық мүмкіндіктерін кеңейтуге жол ашады. Бұл өз кезегінде ұлттық техникалық реттеу жүйесін халықаралық талаптар негізінде жетілдіруге бағытталған реформаларды жүйелі түрде жалғастырудағы маңызды қадам болып саналады.

Айта кетейік, IQNet халықаралық сертификаттау ұйымы 1990 жылы құрылған және басқару жүйелерін сертификаттау саласындағы ең ірі халықаралық желілердің бірі болып табылады. Ұйымның штаб-пәтері Швейцарияның Берн қаласында орналасқан.

Қазіргі таңда IQNet желісі әлемнің 36 жетекші елінде қызмет атқаратын беделді менеджмент жүйелерін сертификаттау органдарын біріктіріп отыр. IQNet аясында 150-ден астам елде 310 мыңнан астам сертификат рәсімделген, бұл жаһандық нарықтың шамамен 30 пайызын құрайды. Сонымен қатар желі 30-дан астам тілде аудит жүргізу мүмкіндігіне ие 17 мыңнан астам халықаралық аудитор мен сарапшыны қамтиды.

IQNet мүшелері қатарында Испания, Франция, Германия, Жапония, Қытай, Корея Республикасы, Түркия, Швейцария және өзге де бірқатар елдердің беделді сертификаттау органдары бар.

Сарапшылардың пікірінше, IQNet желісіне қосылу Өзбекстанда енгізілген менеджмент жүйелерінің халықаралық нарықтарда танылу аясын кеңейтеді, елдің Ғаламдық сапа инфрақұрылымы индексіндегі орнын жақсартады. Сонымен бірге бұл қадам халықаралық стандарттар бойынша жұмыс істей алатын білікті кадрларды даярлауға, сыртқы сауда байланыстарын нығайтуға және өндірушілер мен тұтынушылар арасындағы сенімді арттыруға қызмет етеді.