Ўзбекистон Республикаси Президенти “Техник ҳиҳатдан тартибга солиш соҳасидаги ислоҳотларни илғор халқаро амалиёт асосида жадаллаштириш чора-тадбирлари тўғрисида”ги фармонни имзолади.

Унга мувофиқ, қуйидагилар техник жиҳатдан тартибга солиш соҳасидаги ислоҳотларнинг устувор йўналишлари этиб белгиланди: 

а) техник жиҳатдан тартибга солиш, метрология ва мувофиқликни баҳолаш соҳасида амалдаги самарасиз назорат тизимини бекор қилиш, маҳсулотнинг бозор назорати амалиётини жорий этиш; 

б) саноатда тўлиқ халқаро стандартларни қўллашга ўтиш; 

в) миллий сифат инфратузилмаси иштирокчилари мустақил фаолиятига шарт-шароит яратиш ва манфаатлари тўқнашувини бартараф этиш; 

г) саноат метрологияси, ўлчаш воситалари верификацияси ва калибрлашни кенг жорий қилиш, қиёслаш амалиётидан воз кечиш; 

д) ишлаб чиқариш ва хизмат кўрсатиш корхоналари, тадбиркорликнинг барча йўналишлари ҳамда оддий истеъмолчиларни қамраб олувчи "сифат маданияти"ни шакллантириш.

Қуйидагилар Миллий сифат инфратузилмасини ривожлантиришнинг 2026 йил учун асосий мақсадли кўрсаткичлари этиб белгиланди: 

а) Барқарор ривожланиш учун сифат инфратузилмаси индексида Ўзбекистон Республикаси ўрнини камида 20 поғонага кўтариш; 

б) Халқаро тарози ва ўлчовлар бюроси томонидан эътироф этилган калибрлаш имкониятлари сонини 2,5 баробарга ошириш; 

в) халқаро даражада тан олинган аккредитация хизматлари улушини камида 80 фоизга етказиш. 

Президент фармони билан:

а) Ўзбекистон техник жиҳатдан тартибга солиш агентлиги тизимидаги Ўзбекистон аккредитация маркази, амалдаги фаолият йўналиши, штат бирликлари, мол-мулки ҳамда молиялаштириш тартиби ва манбалари сақлаб қолинган ҳолда Вазирлар Маҳкамаси бўйсунувига ўтказилади; 

б) Ўзбекистон илмий-синов ва сифат назорати маркази фаолияти тўхтатилади ҳамда унинг таркибидаги мувофиқликни баҳолаш органлари тугатилади;

в) Ўзбекистон стандартлар институти унга Ўзбекистон илмий-синов ва сифат назорати марказини қўшиб олиш орқали қайта ташкил этилади. 

ЎзА