Айни кунларда касбий имтиҳонлар асосида номзодлар сараланадиган олий таълим муассасаларида синовлар давом этмоқда. Ўзбекистон журналистика ва оммавий коммуникациялар университетининг медиадизайн йўналишига кириш учун талабгорлар ўз иқтидори ва билимларини синовдан ўтказди. 

Университетда интернет журналистика ва ижтимоий тармоқлар, халқаро журналистика ва жамоатчилик билан алоқалар, босма оммавий ахборот воситалари факультетлари мавжуд бўлиб, абитуриентлар аввалги йилларда фақат ижодий имтиҳон орқали сараланар эди. 

Маълумот учун айтиш керакки, бу йил университетдаги фақат битта йўналишда касбий имтиҳон қолдирилган. Қолган барча йўналишларда талабгорлар тест синовларидан ўтади.

Медиадизайн йўналишида имтиҳон икки босқичда ташкил этилмоқда. Бунда ёзма (эссе) ва амалий имтиҳон бўлади. Ёзма ишда мавжуд билетлардан биттаси танланиб, шу асосда эссе ёзилади. Абитуриент энг кўп 89 балл тўплаши керак. Иккинчи босқичда ўз йўналиши бўйича компьютер орқали икки турдаги дизайнни яратади. Биринчи тур – сайт дизайни, газета дизайни, журнал муқоваларини яратиш бўлса, иккинчиси – талабгор ўз номига бренд, логотип дизайнини ишлаб чиқади. Бунда абитуриент 100 балл тўплаши керак бўлади.

2020-2021 ўқув йили учун ушбу йўналишга 25 ўрин учун 104 абитуриент ҳужжат топширган.

Ижодий имтиҳон шаффоф ва адолатли ўтиши учун жараёнга амалиётчи-журналистлар ҳам таклиф этилди. Абитуриентларнинг кириш вақтида тана ҳарорати ўлчаниб, дезинфекцион йўлакчадан ўтказилиб, шахсий гигиеник воситалар билан таъминланди.