ЕХҲТ Котибиятининг Терроризмга қарши кураш департаменти раҳбари ўринбосари Фейзо Нуманая “БМТ Глобал аксилтеррор стратегиясини амалга ошириш бўйича Қўшма ҳаракатлар режаси доирасида Марказий Осиё давлатларининг минтақавий ҳамкорлиги” юқори даражадаги халқаро конференциясида шундай мурожаат билан чиқди.

Экспертнинг фикрича, терроризмга муваффақиятли қарши туриш учун давлат ва нодавлат субъектлари саъй-ҳаракатини бирлаштиришда давом этиш зарур.

Бугунги кунда терроризм учун қулай шарт-шароит яратилишининг олдини олишга қаратилган ишлар жамоатчилик фикрини ўзгартирди, терроризмга қарши “қатъий” стратегияларни амалга оширишда нафақат идоралараро, балки бутун жамият ёндашуви муҳим аҳамиятга эга.

Бинобарин, “зўравон экстремизм” атамасига таъриф беришдаги ҳуқуқий бўшлиқ ҳали-ҳамон жиддий муаммоларни келтириб чиқармоқда. Бугунги кунда экстремизмга қарши ёндашув фақат ҳуқуқни муҳофаза қилиш идораларига тегишли, деган қараш мавжуд бўлиб, бу терроризмга қарши курашга фуқаролик жамиятини жалб этишга тўсқинлик қилмоқда.

Экстремизмга қарши кураш жараёнида гендер мезонини кучайтиришга ҳам жиддий аҳамият бериш лозим. Зеро, гендер жиҳатлари ҳисобга олинмаган ёки нотўғри ишлаб чиқилган сиёсат ижтимоий гуруҳлар янада кенгайишига олиб келади.

Айни йўналишда ЕХҲТ вакиллари “Лидерлар тоқатсизлик ва зўравон экстремизмга қарши” (LIVE) ташаббуси орқали Жануби-шарқий Европа ва Марказий Осиёдаги фуқаролик жамиятининг 700 нафар вакили, аёллар, ёшлар ва жамоат етакчилари билан маслаҳатлашдилар.

Бундан ташқари, ташкилот Марказий Осиё аҳолисининг асосий қисмини ёшлар ташкил этгани учун экстремизмга қарши курашда ёшларга алоҳида эътибор қаратмоқда. Ҳозирги кунда жадал ривожланаётган рақамли трансформация жараёнида ёшлар фаол иштирок этади. Шу сабабли, медиасаводхонлик ва танқидий фикрлаш қобилияти онлайн радикаллашувнинг олдини олишда муҳим ўрин тутади.

Шу муносабат билан ЕХҲТ давлат ва нодавлат ташкилотлари вакиллари учун, айниқса, ёшларда медиасаводхонлик ва танқидий фикрлашни ривожлантириш бўйича ўқув модули ишлаб чиқмоқда.

Хуллас, ЕХҲТ вакили Фейзо Нуманая таъкидлаганидек, Тошкент конференцияси экстремизм ва терроризмга қарши курашнинг умумий йўлини белгилаш, инсон ҳуқуқи ва асосий эркинлиги билан боғлиқ стратегияни ишлаб чиқиш ва бутун дунё бўйлаб амалга ошириш учун катта имконият яратади.

Гўзал Сатторова,
Аълохон Абдуллаев (сурат), ЎзА