ФОТОРЕПОРТАЖ

Бугун, 26 декабрда аэропорт биринчи рейсни қабул қилди. “Uzbekistan Airways” авиакомпаниясининг “Тошкент – Термиз” йўналиши бўйича HY-65 рейси 146 нафар йўловчи билан, маҳаллий 08:15 да “Термиз” аэропортига келиб қўнди.

55 кунлик танаффусдан сўнг, “Термиз” халқаро аэропорти самолётларни қабул қилиш ва жўнатиш учун яна очилди. Қайта қуриш доирасида узунлиги 3000 метр ва эни 60 метр бўлган янги учиш-қўниш йўлаги, юриш йўлаклари ва учта самолёт тўхташ жойи учун перронни ўз ичига олган, янги 4Э тоифали аэродром мажмуаси қурилди. Шунингдек, аэродромга замонавий САТ-И ИСАО ёритиш ускуналари тизими, метеорологик ва радионавигация қўниш тизимлари ўрнатилди. Янги аэродром мажмуасини қуриш лойиҳаси 550 миллиард сўмга баҳоланмоқда. Айни пайтда 377 миллиард сўмлик ишлар бажарилган. Лойиҳанинг якуний босқичи – учта самолёт турар жойи ва иккинчи юриш йўлаги 2023 йилнинг апрелигача якунланиши режалаштирилмоқда.

[gallery-10076]

Эътиборга молик жиҳати, янги аэродромнинг учиш-қўниш йўлаги бетондан қурилгани. Бу Сурхондарё вилоятининг иссиқ иқлими шароитида энг яхши ечим бўлиб, мустаҳкам ва чидамлилиги билан аҳамиятлидир. Бугунги кунга қадар фақат “Навоий” ва “Термиз” аэропортида бетондан учиш-қўниш йўлаги қурилган.

Эслатиб ўтамиз, “Термиз” аэропорти янги аэродром мажмуаси реконструкция ишлари муносабати билан 1 ноябрь куни ёпилган бўлиб, парвозлар вақтинча республиканинг бошқа халқаро аэропортларига йўналтирилган эди.

Жонибек ҚЎЗИМУРОДОВ (сурат), ЎзА