Андижонда жойлашган жисмоний тарбия ва енгил атлетика ҳамда ўйин турлари бўйича ихтисослаштирилган спорт мактаби кортларида халқаро теннис турнири бўлиб ўтмоқда.

“J60” таснифидаги мазкур мусобақада 8 та давлатдан келган ёш теннисчилар иштирок этмоқда. 18 ёшгача бўлган теннисчилар ўртасидаги баҳсларнинг илк туридан муваффақиятли ўтган ҳамюртимиз Маҳмудбек Бекназаров иккинчи босқичда германиялик Вигго Вагенкнехтни билан рақобатлашадиган бўлди.  

Маҳмудбек ва Вигго ўтган ҳафтада Наманганда ташкил этилган “J30” тоифасидаги турнир финалида ўзаро рақобатлашган эди.  

Шунингдек, ўғил болалар ўртасида  Абдулазизжон Усмонжонов, Беҳрузжон Бахшиллаев,  Алан Зинатулин, Акмал Абдуллаев ва Аҳмаджон Тошмуҳамедов каби ёш теннисчиларимиз иккинчи босқич йўлланмасини қўлга киритди.  

Қизлар ўртасида эса Нигина Алимова ҳамда Вероника Жепарова биринчи даврадан муваффақиятли ўтди.  Энди Нигина нейтрал теннисчи Кристина Камоловага, Вероника эса бошқа бир нейтрал мақомдаги спортчи Яна Оболенскияга қарши кортга чиқади.  

Жавоҳир Тошхўжаев, ЎзА