Тожикистоннинг Душанбе шаҳрида ўсмирлар ўртасидаги J60 таснифига кирувчи «Tajikistan Open» турнирида теннисчиларимиз жуфтлик ва яккалик баҳсларида муваффақиятли иштирок этмоқда.

Яккалик баҳсларининг биринчи даврасида ҳамюртимиз Данила Квасов нейтрал теннисчи Давид Могилевскийни 7:6, 6:3 ҳисобида таслим қилди ва иккинчи босқичда қозоғистонлик Никита Николенко билан рақобатлашадиган бўлди. Шунингдек, яна бир теннисчимиз Абдулазиз Усмонов илк босқичда нейтрал теннисчи Андрей Пикулинга қарши ўйинда 6:3, 3:0 ҳисобида олдинда бораётган бир пайтда рақиби ўйинни давом эттиришдан бош тортди ҳамда мағлубиятини тан олди. Энди Абдулазиз чорак финал йўлланмаси учун мезбонлар вакили Сомон Амонов билан куч синашади.

Шунингдек, бугун мусобақанинг жуфтлик беллашувларида ҳамюртимиз Имрон Ҳайитбоев нейтрал теннисчи Аркип Козлов билан тандемда қозоғистонлик Ратмир Пулкейвич ҳамда нейтрал теннисчи Александр Дождев билан баҳслашса, ёш теннисчиларимиз Данила Квасов ва Амир Сафоев нейтрал теннисчилар Федор Алтухов ҳамда Артем Букин дуэтига қарши кортга чиқади. Ушбу ўйинлар чорак финал доирасида ўтказилади.

Жавоҳир Тошхўжаев, ЎзА