Озарбайжоннинг Боку шаҳрида Халқаро теннис федерацияси томонидан ўтказилаётган ўсмирлар ўртасидаги J30 таснифига кирувчи нуфузли халқаро турнирда теннисчиларимиз муваффақиятли иштирок этмоқда.

Мусобақанинг яккалик баҳсларида ҳамюртимиз Маҳмудбек Бекназаров 1/4 финалда руминиялик Матей Сукуни 6:3, 6:3, ярим финалда грузиялик Николоз  Сирбиладзени 6:2, 6:1 ҳисобида енгди ва сўнгги ҳал қилувчи финал ўйинида нейтрал теннисчи Никита Давидовскийга қарши кортга чиқадиган бўлди.

Жуфтлик беллашувларида эса Амир Сафоев ва Асилбек Исмоилов тандеми ўз иштирокини муносиб давом эттирмоқда. Улар ярим финалда АҚШ вакили Аруш Коте ҳамда исроиллик Итай Килимникни 6:4, 5:7, 10:7 ҳисобида мағлубиятга учратиб, финал босқичига чиқди.  

Шу тариқа, Амир ва Асилбек халқаро турнирнинг жуфтликлар ўртасидаги бош соврин учун ўтадиган ўйинида нейтрал теннисчилар Аркиом Аскирка ва Марк Хаидт дуэти билан рақобатлашади.  

Жавоҳир Тошхўжаев,

ЎзА