Фарғонада Халқаро теннис федерацияси томонидан ўсмирлар ўртасида J100 таснифига кирувчи нуфузли мусобақа ўтказилмоқда. Турнирнинг навбатдаги кунида қизлар орасида яккалик ва жуфтлик баҳслари ташкил этилди.

Яккалик беллашувларида мамлакатимиз шарафини ҳимоя қилаётган Нигина Алимова илк босқичда нейтрал теннисчи Екатерина Вороновани 6:4, 4:6, 6:4, иккинчи даврада қозоғистонлик Адия Омарбекни 7:6, 6:3 ҳисобида таслим этиб, чорак финалда нейтрал теннисчи Александра Малова билан рақобатлашадиган бўлди.  

Жуфтлик баҳсларида Мадинахон Солижонова ҳиндистонлик Картика Падмакумар билан тандем ҳосил қилиб, биринчи босқичдан муваффақиятли ўтди ва ярим финал йўлланмаси учун қозоғистонлик Албина Какенова ҳамда Сатима Торегенга қарши кортга тушиш ҳуқуқини қўлга киритди. Шунингдек, чорак финалда Шаҳзода Ортиқбоева ҳамда нейтрал теннисчи Мария Маслиакова дуэти нейтрал теннисчилар Юлия Лиахава ҳамда Влада Разина жуфтлигига қарши кортга чиқади.  

Жавоҳир Тошхўжаев,

ЎзА