Испаниялық теннисші Карлос Алькарас Барселонада өткен ATP 500 турнирінің жеңімпазы атанды.

Әлемнің екінші нөмірлі теннисшісі финалда грециялық Стефанос Циципасқа қарсы кортқа шығып, 1 сағат 19 минутқа созылған кездесуде 6:3, 6:4 есебімен ұтты. 

Бұл теннисшілердің төртінші кездесуі болды. Карлос Алькарас барлық кездесуде жеңіске жеткен.

Осылайша 19 жасты ракетка шебері осы турнирдегі жеңісін сәтті қорғай алды. Алькарас өткен жылы да чемпион атанған болатын.

Бұл чемпионат Карлос Алькарасқа 500 рейтингтік ұпай мен 478 мың еуро табыс әкелді.