Хабарингиз бор, мамлакатимизнинг биринчи рақамли теннисчиси Ҳумоюн Султонов Ҳиндистоннинг Пуна шаҳрида ўтаётган “Челленжер“ турнирида иштирок этмоқда.

«ATP 100» таснифига кирувчи мазкур мусобақанинг жуфтлик баҳсларида Ҳ.Султонов италиялик шериги Энрико Далла Валле билан тандем ҳосил қилиб, илк босқичда мезбонлар вакили Каран Синг ва Нитин Кумар Синҳани ҳар иккала сетда бир хил 6:2 ҳисобида таслим қилган ҳолда чорак финалга йўл олди.

Энди Ҳумоюн ва Энрико ярим финал йўлланмаси учун ўтадиган беллашувда австралиялик теннисчилар Блэк Майодон ва Маттю Христофер Ромиос жуфтлигига қарши кортга тушади.

Эслатиб ўтамиз, теннисчимиз яккалик баҳсларидаги илк учрашувини австралиялик Тристан Скулкейтнига қарши ўтказиб, 6:3, 4:6, 6:3 ҳисобида рақиби устидан ғалаба қозонганди. Нимчорак финалда бошқа бир австралиялик теннисчи Бернард Томич билан рақобатлашади.

Жавоҳир Тошхўжаев, ЎзА