Бугун, 3 март куни Бирлашган Араб Амирликларининг Фужайра шаҳрида ўтаётган "Челленжер" турнирининг асосий тўр баҳсларида мамлакатимизнинг биринчи рақамли ракеткаси Сергей Фомин кортга чиқади.

Ўзбекистон терма жамоаси аъзоси Фоминга халқаро турнирнинг илк босқичида нейтрал мақомда турнирда иштирок этаётган россиялик Петр Барбирюков рақиблик қилади.

Айтиш лозим, 25 ёшли С.Фомин ҳозирда ATP рейтингида 326-қаторда бўлса, унинг рақиби 24 ёшли Барбирюков 298-ўринни эгаллаб турибди.

Шунингдек, айни кунларда Туркиянинг Анталия шаҳрида аёллар ўртасида давом этаётган "Челленжер" мусобақасида юртимиз шарафини халқаро майдонда ҳимоя қилиб келаётган Полина Кудерметова иштирок этмоқда.

Мусобақа дастурига биноан WTA рейтингида 148-ўринда бораётган П.Кудерметова эртага, 4 март куни турнирнинг асосий баҳсида ўз иштирокини бошлайди.

Терма жамоамиз аъзоси ушбу турнирнинг 1/16 финал босқичида нейтрал мақомда мусобақада қатнашаётган россиялик Алина Чараевага қарши баҳс олиб боради. Россиялик ракетка устаси ҳозирда WTA рейтингида 138-ўринни банд этган.

Т.Рўзиев,

ЎзА