Бугун, 9 сентябрь куни теннис бўйича Ўзбекистон терма жамоаси “Дэвис кубоги”да Япония жамоасига қарши ўйнайдиган таркибни эълон қилди.

Бу ҳақда Ўзбекистон теннис федерацияси маълум қилди.

Жорий йилнинг 16-17 сентябрь кунлари пойтахтимиз Тошкентда "Дэвис Кубоги"нинг биринчи босқич ўйинлари ўтказилади. Унда қуръа натижаларига кўра, ҳамюртларимиз Япония жамоасига қарши баҳс юритиши белгиланган.

Пойтахтимиздаги Олимпия захиралари теннис мактаби кортларида кечадиган беллашувларда кун чиқар юрт ракетка усталарига қарши ўйинларда терма жамоамиз мураббийи Фарруҳ Дўстов етакчилигидаги истеъдодли теннисчиларимиз Сергей Фомин, Ҳумоюн Султонов, Денис Истомин, Санжар Файзиев ва Максим Шиндан иборат таркиб юртимиз шарафини ҳимоя қилади.

Т.Рўзиев, ЎзА