Исроил Бош вазири Биньямин Нетаньяхунинг АҚШга сафари олдидан 17 сентябрь куни минглаб кишилар ҳукумат сиёсатига қарши ҳафталик намойиш ўтказиш учун Тель-Авивда тўпланган. Демонстрантлар 1948 йилдаги Мустақиллик декларацияси нусхасини кўтариб олган, деб ёзди “DW” агентлиги.

Исроил Давлатининг ташкил этилиши ва асосий тамойиллари акс этган мазкур ҳужжат мамлакат Олий судининг 12 сентябрда бўлиб ўтган йиғилишида мунозара уйғотди. Судьялар шу куни Кнессет (парламент)да қабул қилинган муҳим қонунлардан бирининг ҳуқуқий мақомини кўриб чиққан. Судда ҳукумат позициясини ҳимоя қилган адвокат Мустақиллик декларацияси мажбурий юридик кучга эга эмаслигини айтган. Айни шу қараш намойишчилар ва мухолифатнинг кескин норозлигига сабаб бўлди. 

Кнессет 24 июль куни Олий суднинг ҳукумат қабул қилган қарорни бекор қилиш ҳуқуқини чекловчи ислоҳот назарда тутилган қонун лойиҳасининг биринчи, асосий бандини қабул қилган эди. 

37 ҳафтадирки, мамлакатда тўхтовсиз намойиш ўтказилмоқда.