Эрон президенти Маъсуд Пезешкиён ўлка губернаторлари билан учрашувида пойтахт Теҳрондаги сув инқирози билан боғлиқ ўз хавотирини билдирди.

– Бугун Теҳрон сув ресурсларининг жиддий қисқариши билан юзма-юз келмоқда ва бизнинг захираларимиз хавотирли вазиятда, -деди у. – Бу инқирозни енгиш жамоатчиликнинг мувофиқлашувисиз мумкин эмас. Батафсил баҳолашлар шуни кўрсатадики, сув ресурслари шу пайтгача нотўғри бошқарилган.

Ҳозирги вазиятда табиатни ёки мулозимларни айблаб бўлмаслигини таъкидлаган Пезешкиён ўтмишдаги нотўғри қарорлар бундай ҳолатга олиб келганини айтди. 

– Бугунги кунда биз ислоҳотлар йўлидан масъулият билан, синчковлик билан боришимиз керак, -деди Эрон етакчиси. – Бизга узоқни кўра оладиган бошқарув керак. Мамлакатни сув инқирозидан қутқариш учун ҳукумат ҳам, халқ ҳам максимал даражада эътибор қаратиши, фаол иштирок этиши керак.

Айни пайтда Эронда давом этаётган қурғоқчилик туфайли тўғонлардаги сув сатҳи кескин пасайган. Теҳрон вилояти сув ресурслари бошқармаси эълон қилган баёнотда пойтахтни сув билан таъминловчи тўғонлардаги сув захиралари сўнгги асрдаги энг паст даражага етгани маълум қилинган.

М.Пирматова, ЎзА