Эроннинг Ислом инқилоби қўриқчилари корпуси АҚШ президенти Дональд Трампнинг уруш тез орада тугаши ҳақидаги баёнотига кескин муносабат билдирди. Теҳронга кўра, урушнинг қачон ва қандай шартларда якунланишини Эроннинг ўзи белгилайди. Бу ҳақда DW нашри хабар қилди.

Tasnim агентлиги тарқатган баёнотда шундай дейилади: «Уруш қачон тугашини айнан биз ҳал қиламиз. Жанг майдонидаги шароитлар ва урушнинг якунланиши Ислом республикасининг қўлида».

Бундан аввал Трамп Эронга қарши уруш кутилгандан анча тез тугаши мумкинлигини айтган эди. Унинг таъкидлашича, Эрон ҳарбий жиҳатдан жиддий зарар кўрган.  

Трамп журналистлар билан учрашганда, уруш деярли ниҳоясига етганини айтди. У Эроннинг барча ҳарбий тизимлари издан чиққанини маълум қилган. Унинг қўшимча қилишича, ҳарбий операция режадан анча тез суръатда олиб борилмоқда.

Аввалроқ Трамп уруш тахминан тўрт-беш ҳафта давом этиши мумкинлигини айтган эди. Кейинчалик Оқ уй матбуот котиби Каролайн Ливитт бу муддат тўрт-олти ҳафта бўлиши мумкинлигини билдирган.

Эрон ташқи ишлар вазири Аббос Ароғчи мамлакат ракетали ҳужумларни қанча керак бўлса, шунча давом эттиришини айтди. 9 март куни берган интервьюсида у Эронга қарши ҳужумлар давом этаётганини, бироқ мамлакат бунга тайёр эканини таъкидлади.

«Биз уларга қарши ракеталаримиз билан қанча керак бўлса, шунча ҳужум қилишга тўлиқ тайёрмиз», - деди Ароғчи.

Шу билан бирга, у Эроннинг АҚШ билан янги музокаралар ўтказиш эҳтимолини рад этди. Унинг сўзларига кўра, Теҳрон сўнгги вақтларда америкаликлар билан музокаралардан «жуда аччиқ тажриба» олган.

<iframe width="640" height="420" src="https://www.youtube.com/embed/xV8yLVTO7ss" title="Tehron: Urushni qachon tugashini AQSH emas, Eron hal qiladi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Кенжа Бекжонов, Искандар Исматов (видео), ЎзА