Эрон ҳукумати мамлакатда давом этаётган ҳукуматга қарши намойишлар муносабати билан Франция, Германия, Италия ва Буюк Британия элчиларини чақириб, Европа давлатларини намойишчиларни қўллаб-қувватлашни тўхтатишни талаб қилди. Evronews тарқатган хабарга кўра, Ташқи ишлар вазирлиги дипломатларга тартибсизликлар оқибатида етказилган зарар акс этган видеоларни тақдим этган.

Норвегияда жойлашган Iran Human Rights ташкилоти маълумотига кўра, намойишларни бостириш жараёнида камида 648 нафар одам ҳалок бўлган. Ташкилот қурбонлар сони бундан анча кўп бўлиши мумкинлигини, интернет чекловлари сабабли мустақил текширув қийинлашаётганини билдирган.

Ғарб давлатлари Эрон ҳокимиятининг бу ҳаракатларини қоралади. Франция президенти Эммануэль Макрон ва Германия канцлери Фридрих Мерц намойишчиларга қарши зўравонликни қабул қилиб бўлмас ҳолат, деб баҳолади. Европа Иттифоқи Эронга нисбатан қўшимча санкциялар жорий этиш имкониятини кўриб чиқаётганини маълум қилди.

Намойишлар 28 декабрь куни Теҳронда бозорлар ёпилиши ва миллий валютанинг кескин қадрсизланиши ортидан бошланган. Кейинчалик улар мамлакатнинг бошқа ҳудудларига ҳам тарқалди. Намойишчилар энди сиёсий талаблар қўймоқда.  

Бунга жавобан, ҳукумат тизимни қўллаб-қувватлаш мақсадида оммавий митинглар ўтказди. Олий раҳбар Оятуллоҳ Али Ҳумонаий бу митингларни ташқи кучларга берилган “огоҳлантириш” деб атади. Парламент спикери Муҳаммад Багир Ғолибоф эса ҳукумат ҳаракатларини “террористларга қарши кураш” сифатида баҳолади.

<iframe width="650" height="420" src="https://www.youtube.com/embed/Agmzuu671gQ" title="Tehron Yevropa elchilariga talab qo‘ydi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Кенжа Бекжонов, Анвархўжа Аҳмедов, ЎзА