Ўзбекистон ва Қорақалпоғистонда хизмат кўрсатган артист Раъно Ярашева миллий театр ва кино санъатимизда ўз ижро услуби, ижод йўлига эга бўлган инсонлардан саналади. Ўзбек Миллий академик драма театрида халқимизнинг севимли санъаткори Раъно Ярашева таваллудининг 65 йиллигига бағишланган ижодий-маърифий кеча ташкил этилди.

Юбилей кечада маданият вазирининг биринчи ўринбосари Авазхон Тожихонов иштирок этиб, устоз санъаткорни таваллуд куни билан табриклади ҳамда вазирликнинг “Маданият ва санъат фидокори” кўкрак нишонини тантанали топширди.  

1987 йилдан буён Ўзбек Миллий академик драма театрида фаолият юритиб келаётган актриса Раъно Ярашева ўзининг юксак масъулияти, меҳнатсеварлиги, камтарлиги ва ижодий фаоллиги билан жамоаси ва театр санъати мухлисларининг ҳурматини қозонган.

Актриса театр ва кино соҳасида самарали фаолият юритиб, Ўзбек Миллий академик драма театрида саҳналаштирилган “Ёрқиной” спектаклида Ёрқиной, “Ҳаёт эшик орти”да Табассум” “Жиноят устида ушлансин”да Манзура, “Бахти қаро келин ёки...”да келин, “Меҳробдан чаён”да Нозик, “Қаллиқ ўйин”да Ҳамрогул, “Соҳибқирон Темур”да вазирнинг қизи, “Чимилдиқ”да ўланчи янга, “Боши қотган ошиқлар”да Паришонхотир келин, “Уфқ”да қишлоқ аёли, “Шайтон ва фаришта”да Ўғилой ролини ижро этган.  

Устоз санъаткорнинг шунингдек, “Омонат дунё”да хотин-қизлар қўмитаси раиси, “Аёлғу”да она, “Қирмизи олма”да совчи она, “Бевалар”да Раъно, “Увайсий”да Нодирабегим, “Андишали келинчак”да Тўйчинисо, “Ўткан кунлар”да Офтоб ойим, “Заминдан олис кетма”да Гўзал, “Ўжарлар”да Ақсингул, “Жалолиддин Мангуберди”да Туркон Хотун каби такрорланмас  образларни яратган.

Шунингдек, актриса Раъно Ярашеванинг “Меҳробдан чаён”, “Кеча ва кундуз”, “Ревизор”, “Жаҳонотин Увайсий”, “Адабиёт муаллими”, “Лайли ва Мажнун”, “Кўнгил кўчалари”, “Қирқ тоғоранинг қирқ ноғораси”, “Балои нафс”, “Шунчаки ҳазил”, “Қарзи хасана”, “Зурриёт”, “Севинч”, “Телба”, “Нотаниш”, “Фериде”, “Муҳаббатнома” каби кинофильмлардаги образлари билан томомашабинларнинг муҳаббатини қозонган.

Ижодий-маърифий кечада мамлакатимизда Президентимиз Шавкат Мирзиёев ташаббуси асосида миллий театр санъати равнақига кўрсатилаётган эътибор ва ғамхўрлик, устоз санъаткорларга ҳурмат ва эҳтиром кўрсатиш, уларнинг ижод йўлини кенг тарғиб этиш, ҳар жиҳатдан қўллаб-қувватлаш борасидаги эзгу ташаббуслар ҳақида батафсил сўз юритилди.  

Устоз ижодкор Раъно Ярашеванинг фаоллиги, фидойилиги, саҳнага садоқати ёшлар учун ибрат мактаби экани алоҳида эътироф этилди.

Театрлаштирилган саҳна кўринишлари, гўзал мусиқа намуналари кечага янада файз бағишлади.                                   

Н.Усмонова,  

ЎзА