Мамлакатимизда ўтказилган театр томошалари ҳафталиги доирасида Бухоро вилояти мусиқали драма театрида спектакллар ва театрлаштирилган концерт намойишлари ўтказилди.

– Кўҳна ва боқий Бухоро мажмуасида бошланган Наврўз байрами тантаналари театр кунлари тадбирига уланиб кетди, –дейди Бухоро вилояти мусиқали драма театри адабий бўлим мудири, Ўзбекистон Ёзувчилар уюшмаси аъзоси Моҳигул Назарова. – Артистларимиз Наврўз байрами шодиёнасида Ҳ.Ҳ.Ниёзийнинг “Туҳматчилар жазоси” комедиясини намойиш этди. Бу асарда юзи бошқа ва дили бошқа инсонларнинг ҳаққоний қиёфаси очиб берилган. Ҳамма жамиятда ҳам туҳматчи ва ғийбатчи одамлар бўлган. Спектакль воқеалари йиғилганларга манзур бўлди.  

Театр кунлари давомида томошабинлар куй-қўшиқлар ва ҳавода муаллақ турувчи дарвишлар, театр фойесида ташкил қилинган рассомлар кўргазмаси билан қарши олинди. Яна саҳна декорациялари ва тарихий спектакллар либослари кўргазмаси ҳам намойиш этилди. Бухоро вилояти мусиқали драма театрида “Туҳматчилар жазоси”, “Хорижлик келин ёхуд бухороча тўй қиламан” комедиялари, “Хонума” мусиқали комедияси, “Хўтикча ва Йўлбарс”, “Сегоҳ” мусиқали драмаси намойиш этилди.  

27 март – Халқаро театр кунида эса В.Шекспирнинг “Ричард III” трагедияси томошабинлар эътиборига ҳавола этилди.  

Зариф Комилов,  

ЎзА