Туркиянинг Истанбул шаҳрида Туркий давлатлар ташкилоти (ТДТ) энергетика вазирларининг 5-йиғилиши бўлиб ўтди.

Қайд этилишича, йиғинда томонлар энергетика соҳасидаги ҳамкорликнинг “ТДТни глобал геосиёсий марказга айлантириш жараёнида” муҳимлигини таъкидлашган. Шунингдек, Каспий денгизини туркий дунёни бирлаштирувчи кўприк сифатида кўриш доирасида амалга оширилаётган “Яшил энергия йўлаги” лойиҳасига алоҳида эътибор қаратилди.

Транскаспий энергетика инфратузилмасини ривожлантириш, шунингдек, нефть ва табиий газ, муҳим минераллар, ядро энергияси ва учинчи мамлакатларга қўшма энергия инвестициялари каби соҳаларда ҳамкорликни кенгайтириш масалалари муҳокама қилинди.

Ўзаро мулоқот чоғида ягона энергия кўпригини ташкил этувчи Марказий Осиё, Озарбайжон ва Туркия ўртасида тажриба алмашиш, технологик ҳамкорлик ва янги лойиҳаларни ишлаб чиқиш орқали минтақавий энергия хавфсизлигини мустаҳкамлашга қаратилган саъй-ҳаракатлар таъкидланди.

С.Раҳимов, ЎзА