Наманган вилоятида 82 минг 600 гектар майдонда етиштирилган пахта ҳосилини ёғин-сочинли кунларга қолдирмай йиғиб-териб олиш, тайёрлов масканлари ва пахта тозалаш корхоналарига топширишга алоҳида эътибор қаратилмоқда.

Наманган вилоятида 82 минг 600 гектар майдонда етиштирилган пахта ҳосилини ёғин-сочинли кунларга қолдирмай йиғиб-териб олиш, тайёрлов масканлари ва пахта тозалаш корхоналарига топширишга алоҳида эътибор қаратилмоқда.

“Наманганпахтасаноат” акциядорлик жамиятининг фаолияти бу борада муҳим аҳамият касб этаётир. Жамият тизимидаги тайёрлов масканлари ва пахта тозалаш корхоналарида мавсумга пухта ҳозирлик кўрилди. “Тўрақўрғон пахта тозалаш”, “Норин пахта тозалаш” акциядорлик жамиятлари каби Учқўрғон, Чуст, Мингбулоқ, Поп, Косонсой, Уйчи туманларидаги 8 шундай корхонага қарашли 21 тайёрлов маскани томонидан пахта хомашёсини қабул қилиш бўйича фермер хўжаликлари билан шартномалар тузилган.

– Тайёрлов масканларида фермер хўжаликларидан юборилган пахтани тезкорлик билан қабул қилиб олиш, қуритиш ва сифатли сақлаш ҳамда бошқа технологик жараёнларни белгиланган тартибда амалга оширишга алоҳида эътибор қаратилмоқда, – дейди “Наманганпахтасаноат” акциядорлик жамияти бошқаруви раиси ўринбосари Одилжон Холмирзаев. – Пахта узатиш ва қуритиш қурилмаларининг кичик механизмлари тўлиқ таъмирланди. Корхоналарда пахта узатувчи ва қабул қилувчи қўшимча саккизта ПЛ-транспортёри ўртнатилди. Тайёргарлик ишлари доирасида корхоналар ҳудуди ёнғинга қарши кураш воситалари билан жиҳозланиб, хавфсизлик техникаси мосламалари синовдан ўтказилди. Мавсумга тайёргарлик ишларида меҳнат муҳофазаси, хавфсизлик техникаси талаблари бажарилишига ҳам алоҳида эътибор қаратилди. Тайёрлов масканлари корхоналаридаги электр узатиш тармоқлари, электр шкафлар, электр ўлчагич жиҳозлари ва эҳтиёт қисмлар лаборатория синовидан ўтказилиб, яроқсизлари янгиланди.