Нидерландиянинг Вейк-ан-Зее шаҳрида давом этаётган “Tata Steel Chess-2026” турнирининг 12-тур баҳслари остонасига келиб, Жавоҳир Синдоров ва Нодирбек Абдусатторов Мастерс” гуруҳида етакчиликни қўлга киритишди.

Кеча ўтказилган 11-тур баҳсида Синдоров қора доналарда ҳиндистонлик Аржун Эргаисига қарши дона сурди.

Қизиқарли ва кутилмаган вазиятларга бой кечган учрашувнинг 66-юриш ҳолатига келиб, Ҳинд шахматчиси таслим бўлганлигини тан олди. Бу ўз навбатида Жавоҳирнинг 7 очко билан қўшимча кўрсаткичларга кўра, 1-ўринга кўтаришига олиб келди.

Ўзбекистоннинг биринчи рақамли шахматчиси Нодирбек Абдусатторов 11-турда нидерландиялик Жорден ван Форестга қарши қора доналарда ҳаракатланди.

Нодирбекнинг ҳужумкорлиги, Нидерландия вакилининг ҳимояланиши кўринишига ўтган ўйиннинг 29-юришдан кейин бошланган такроий дона суришлар охир-оқибат баҳсда муроса йўли танланишига олиб келди.

Бугун, 31 январь куни Нодирбек Абдуксатторв оқ доналарда германиялик Маттиас Блюбаум, Жавоҳир Синдоров ҳам оқ доналарда мазкур турнирнинг ўтган йилги ғолиби Рамешбабу Праггнанандха қаршилигини енгишга ҳаракат қилади.

Айтиш лозим, Абдусатторовнинг рақиби Блюбаум ортда қолган 11 та турнирнинг 3 тасида ғалаба, 7 тасида дуранг, 1 тасида мағлубият натижасини қайд этган. У  “Tata Steel Chess-2026”нинг 4-турида ҳамюртимиз Синдоровдан мағлуб бўлганди.

Синдоровнинг рақиби ҳиндистонлик Рамешбабу Праггнанандха турнир давомида 1 та ғалаба, 7 та дуранг, 3 та мағлубиятга эга. У 2-турда Нодирбек Абдусатторовга таслим бўлганди.

Эслатиб ўтамиз, эртага, 1 февраль куни Вейк-ан-Зее мусобақасининг сўнгги кунги 13-тур баҳсида Нодирбек Абдусатторов қора доналарда Арджун Эригайси билан, Жавоҳир Синдоров Чехия вакили Тай Дай Ван Нгуен билан рўбарў келади.

Тўлқин Рўзиев, ЎзА