Нидерландиянинг Вейк-ан-Зее шаҳрида давом этаётган “Tata Steel Chess-2026” турнири “Мастерс" гуруҳининг поёнига етган 5-тур ўйинлари Нодирбек Абдусатторов ва Жавоҳир Синдоров учун омадли бўлди.

Мазкур турда Абдусатторов қора доналарда турнирда қўшимча кўрсаткичларга кўра етакчилик қилаётган америкалик Ханс Ниманн билан муроса йўлини танлади.

Жавоҳир Синдоров оқ доналарда туркиялик 14 ёшли гроссмейстер Ягиз Хаан Эрдогмусни мағлуб этиши ортидан етакчилар қаторига қўшилиб олди.

Бугун, 22 январь куни турнир иштирокчилари учун дам олиш куни сифатида белгиланган.

Эртага ўтадиган 6-тур ўйинлари остонасида АҚШ вакили Ханс Ниманн ҳамда ҳамюртларимиз Нодирбек Абдусатторов ва Жавоҳир Синдоров 3,5 очко билан 14 нафар иштирокчи орасида етакчилик қилмоқда.

6-турда Абдусатторов турнирда 3 очко билан қўшимча кўрсаткичлар эвазига 6-ўринда бораётган Гукеш Доммаражу билан, Жавоҳир Синдоров қора доналарда ҳиндистонлик Аравинд Читхамбарам билан куч синашади.

Турнирда ғолибликка даъвогарлик қилаётган Ханс Ниманн 6-турда оқ доналарда 2,5 очкога эга германиялик Винсент Каймер қаршилигини енгишга ҳаракат қилади.

Эслатиб ўтамиз, 13 та турдан иборат турнир 1 февралга қадар давом этади.

Т.Рўзиев,

ЎзА