Нидерландиянинг Вейк-ан-Зее шаҳрида ўтказилган “Tata Steel Chess-2026” турнири яна бир бор дунёга ўзбек шахмат мактабининг интеллектуал салоҳиятини намойиш этди.

Ўн етти кунлик шиддатли баҳслар натижасида “Мастерс” гуруҳида 9 очко жамғарган Нодирбек Абдусатторов 88-бор ташкил этилган дунёдаги энг нуфузли турнирнинг ғолиблари қаторидан ўрин эгаллади.

1938 йилдан бери ташкил этиб келаётган ушбу мусобақа тарихига эътибор қаратсак, ўз вақтида жаҳон шахматида катта номга эга бўлган Борис Спасский, Михаил Таль, Любомир Любоевич, Жон Нанн, Анатолий Карпов, Вишванатан Ананд, Владимир Крамник, Гарри Каспаров, Магнус Карлсен сингари ўнлаб кучлилар қаторида ўзбекистонлик вундеркинднинг номи жой олгани қувончли ва эътиборли воқелик бўлди.

Яна бир ўзига хос жиҳат, мусобақада Абдусатторов гуруҳида муносиб ўйин намойиш этган ҳамюртимиз, жаҳон кубоги ғолиби Жавоҳир Синдоров ўтказилган 13 та турда 8,5 очко жамғариб, 2-ўринни қўлга киритди.

Айтиш лозим, жорий йилги Даъвогарлар турнирига ҳозирлик кўраётган Синдоров “Tata Steel Chess-2026” мусобақалари давомида биронта ҳам ўйинда мағлубиятга учрамаган “Мастерс” гуруҳидаги ягона шахматчи бўлишга муваффақ бўлди.  

Турнир якунларига кўра, онлайн рейтинг ҳисобида Абдусатторов ўз кўрсаткичини +19,5 очкога ошириб, 2770 рейтинг билан кучли бешликка кўтарилишга эришгани, Жавоҳир Синдоров эса +19,4 қўшимча очко ҳисобига 2745 рейтинг билан дунё рейтингида 11-ўринга чиққани 2026 йил юртимиз шахматчилари учун юқори кайфият, кўтаринки руҳий шижоатда бошланганидан далолат, дейиш мумкин.

– Нодирбек Абдусатторов 4 йилдан бери ушбу турнирда иштирок этади.  Ҳар йили чемпионлик остонасига жуда яқин келарди. Бу йил ўз мақсадига эришди. Жаҳон шахматчилари орасида жанговарлиги ва курашувчанлиги билан алоҳида ажралиб турадиган Абдусатторовнинг ғолибга айлангани бизни ҳам хурсанд қилди. У ҳар жиҳатдан чемпионликка муносиб. Турнир давомида мувозанатли ва ишончли ўйин намойиш этди. Келгуси йилги мусобақада у ўз ғолиблик шарафини муносиб ҳимоя қилишига чорлаб қоламиз, – деди тақдирлаш маросимида иштирок этган  “Tata Steel Chess” турнири директори Йерун ван ден Берг.

Эслатиб ўтамиз, Вейк-ан-Зее мусобақаси орқали ўзбекистонлик ёшларнинг тафаккурини дунёга ёрқин ифода этган, Ватанимизни улуғлаган шахматчиларимиз, эртага эрта тонгда Тошкентга қайтиб келади.

Тўлқин Рўзиев, ЎзА