Бугун, 30 январь куни Нидерландиянинг Вейк-ан-Зее шаҳрида давом этаётган “Tata Steel Chess-2026” турнирининг 11-турда Нодирбек Абдусатторов ҳам, Жавоҳир Синдоров ҳам қора доналарда ҳаракатланади.

Абдусатторов нидерландиялик Жорден ван Форест билан, Жавоҳир Синдоров ҳиндистонлик Аржун Эргаиси билан куч синашади.

Вейк-ан-Зее мусобақасининг ўтган йилги баҳсларига назар ташлайдиган бўлсак, Нодирбек бир йил муқаддам ташкил этилган “Tata Steel Chess-2025” турнирининг 5-турида айнан Жорден ван Форест билан рўбарў келган.

Ўшанда ҳам ҳамюртимиз қора доналарда ҳаракатланган. Абдусатторовнинг устунлигида кечган ўйиннинг 47-юриш ҳолатида нидерландиялик шахматчи мағлуб бўлганини тан олган.

Аржун Эргаиси – Жавоҳир Синдоров қарама-қаршилиги хусусидаги сўнгги ўйинга тўхталадиган бўлсак, улар ўтган йили 8-11 декабрь кунлари Жанубий Африка Республикасида ўтказилган “Freestyle Chess Grand Slam Tour” турнирининг айланма тизими мусобақасида баҳс олиб борган.

Қора доналарда ҳаракатланган Жавоҳир тажрибали Аржуннинг устунликка эришишига йўл қўймаганди ва ғалабага тенг дурангга эришганди.

Хўш, бугунги баҳслардан қандай натижа кутиш мумкин?

Ортда қолган 10 та турнинг 3 тасини ғалаба, 6 тасини дуранг ва 1 тасини мағлубият билан якунлаган Жорден ван Форест 6 очко билан қўшимча кўрсаткичларга кўра, 3-ўринни эгаллаган вазиятда етакчиликка даъвогарлик йўлида Нодирбекка муносиб қаршилик кўрсатиши тайин.

Худди шунингдек, 1 та ғалаба, 6 та дуранг, 3 та мағлубият захмини тортган Аржун азалий рақибларидан бири саналган Синдоровга йўл бермасликка интилиши шубҳасиз.

Шундай мураккаб ва қизиқарли ўйинларда ҳамюртларимизга омад тилаган ҳолда таъкидлаш керакки, энг муҳими, Абдусатторов ва Синдоровнинг катта руҳий устунликка эга эканлиги уларни муваффақият сари бошлашига ишонгимиз келади.

Эслатиб ўтамиз, Абдусатторов етакчилик қилаётган, Синдоров 2-ўринни эгаллаб турган мазкур турнир 1 февралга қадар давом этади.

Тўлқин Рўзиев, ЎзА