Нидерландиянинг Вейк-ан-Зее шаҳрида давом этаётган “Tata Steel Chess-2026” турнири "Мастерс" гуруҳида ўтказилган 8-тур баҳсларида Нодирбек Абдусатторов рақибига имкониятни бой берган бўлса, Жавоҳир Синдоров ғалабага тенг дурангга эришди.

14 нафар гроссмейстер иштирокидаги муросасиз баҳсларнинг 8-турида Нодирбек Абдусатторов оқ доналарда нидерландиялик Аниш Гири билан куч синашди.

Қизиқарли ва мураккаб кечган ўйин аввалида Абдусатторов бироз устунликка эга бўлди. Бироқ, 30-юриш ҳолатидан кейин вазият бутунлай нидерландиялик шахматчи фойдасига ўзгариб кетди. Бу эса, ўз навбатида Абдусатторовнинг рақибига очко тақдим этишига олиб келди.

Ушбу турда Жавоҳир Синдоров германиялик Винсент Кеймерга қарши қора доналарда ҳаракатланганига қарамасдан муносиб қаршилик кўрсатди ва тўқнашувни дуранг натижа билан якунланишини таъминлай олди.

Ортда қолган 8 та турдан кейин Абдусатторов 5,5 очко билан пешқадамликни давом эттирмоқда. Синдоров 5 очко билан 2-ўринда бормоқда. Уларни таъқиб этаётган америкалик Ханс Ниманн, туркиялик Ягиз Хан Эрдогмус, нидерландиялик Жорден ван Форест ҳисобида 4,5 очко мавжуд.

Бугун, 26 январь иштирокчилар учун дам олиш куни сифатида белгиланган.

Эртага, 27 январь куни турнирнинг 9-турида Жавоҳир Синдоров-Нодирбек Абдусатторов ўзаро куч синашади. 13 та турдан иборат халқаро турнир 1 февралга қадар давом этади.

Т.Рўзиев,

ЎзА