Мемлекеттік қауіпсіздік қызметі Кеден комитетінің қатысуымен өткізген арнайы рейд барысында Ташкент қаласында жасырын жұмыс істеп тұрған есірткі зертханасы әшкереленді.

Атап айтқанда, 1986 және 1988 жылы туған 2 жоғары білімді азамат «Шайхонтохур» ауданындағы пәтерлердің бірінде логистикалық қызмет деген желеумен синтетикалық есірткі өндірумен айналысқан.

Тексеру барысында пәтерде жалпы 56 қаптамада 26 келіге жуық «Мефедрон» есірткі заты, синтетикалық препараттарды дайындауға пайдаланылған 400 келіден астам сұйық және ұнтақ химиялық заттар, сондай-ақ шикізат пен қажетті құрал-жабдықтар бар екені анықталды.

Тергеу басталғанға дейін жүргізілген тексеру барысында есірткіні дайындауға пайдаланылған құрал-жабдықтар, шикізаттар мен прекурсорлар шетелден әкелініп, дайындалған есірткі заттарын сату интернет арқылы жүзеге асырылғаны анықталды.

Рейд барысында алынған есірткі заттары шамамен 80 мың «доза» және қара нарықтағы құны 900 мың АҚШ долларына тең, ал есірткі зертханасында сақталған 400 келіден астам химиялық заттар мен шикізаттың көмегімен шамамен 50 келіге жуық «Мефедрон» синтетикалық препаратынан есірткі затын шығаруға болатыны белгілі болды.

Есірткі зертханасының табылуына қатысты Қылмыстық кодекстің 246 және 273-баптары бойынша қылмыстық іс қозғалып, алдын ала тергеуді МҚҚ тергеу департаменті жүргізіп жатыр.