Ташкенттегі Тарас Шевченко атындағы гастро-туристік көшеде ерекше форматтағы туризм жәрмеңкесі өтті. Мақсат – ішкі туризмді дамыту, туроператорлардың жаңа өнімдерін кеңінен таныстыру және сала ойыншылары арасында серіктестік байланыстар орнату.

Аталған шараға жүзге жуық туризм саласындағы кәсіпкерлер, кәсіподақ ұйымдары, қонақүйлер, туроператорлар мен турагенттіктер, банк және сақтандыру компаниялары қатысты. Жәрмеңкеге келген қонақтар салтанатты түрде – керней мен сырнай үні астында қарсы алынып, ұлттық нақыштағы көріністерге куә болды.

Жәрмеңке аясында туристік компаниялардың жаңа бағыттары таныстырылып, ұлттық қолөнер және мәдениет орталықтарының көрмелері ұйымдастырылды. Сондай-ақ, шеберлік сабақтары мен «Шығыс базары» сауда алаңы, «Өзбек ұлттық тағамдары» көрмесі, фольклорлық ансамбльдердің өнер көрсетілімі көрермен көңілінен шықты.

Іс-шара шеңберінде өткен B2B және B2C форматындағы кездесу алаңдарында туризм саласындағы өзара тиімді ынтымақтастықтың жаңа мүмкіндіктері қаралды. Кездесу қорытындысы ретінде тараптар жаңа туристік бағыттар ашу, инновациялық жобаларды енгізу сынды нақты ұсыныстармен келісті.

Бұл жәрмеңке – туризмді қолжетімді, тартымды әрі заманауи ету жолындағы маңызды қадамдардың бірі.