Ташкент қаласында Қытай Халық Республикасының Өзбекстандағы елшілігімен бірлесіп, Өзбекстан – Қытай бизнес форумы ұйымдастырылды.

Атаулы іс-шараға тиісті министрлік және ведомство басшылары, екі тараптан 400-ге жуық бизнес өкілдері қатысты. Форумның ашылуында Төтенше және өкілетті елші Юй Цзюнь бұл форум екі ел арасындағы байланыстарды тереңдетіп, жаңа жобаларды әзірлеу және сауда-экономикалық ынтымақтастықты дамыту үшін маңызды қадам болатынын атап өтті.

Қытай мен Өзбекстан арасындағы ынтымақтастық кейінгі жылдары тұрақты түрде кеңейіп келеді. Бүгінгі таңда Қытай Өзбекстанның ең ірі сауда және инвестициялық серіктесі болып табылады. 

2024 жылдың соңына қарай Қытайдың Өзбекстанға құйған инвестициялары 10 миллиард доллардан асатыны, тауар айналымы болса 13,1 миллиард долларды құрайтыны болжанып отыр.

Қазіргі уақытта Өзбекстанда Қытай капиталының қатысуымен 3357 кәсіпорын жұмыс істеп, олар энергия, жеңіл өнеркәсіп, инфрақұрылымды дамыту, азық-түлік өнімдерін өндіру, геология мен барлау сияқты маңызды салаларда жобаларды іске асыруда.

Бизнес-форум барысында Өзбекстанда тиімді бизнес жүргізу, кәсіпкерлердің құқықтары мен мүдделерін қорғау үшін жасалған жағдайлар туралы мәлімет берілді. Сонымен қатар, Өзбекстанның инвестициялық және өнеркәсіптік әлеуетінің маңызды аспектілеріне тоқталып өтілді. Инвестициялық жобаларды іске асыру және дайын объектілерді пайдалану барысында кәсіпкерлерге жан-жақты қолдау көрсетуге дайын екендіктері білдірілді.

Іс-шара барысында Өзбекстандағы инвестициялық және туристік әлеуетіне арналған презентациялар ұйымдастырылды. В2В (бизнес-бизнес) және В2G (бизнес-үкімет) форматында кездесулер өткізілді. Қатысушылар жаңа бизнес байланыстарын орнату, болашағы зор бастамаларды талқылау және өзара тиімді келісімдер жасау мүмкіндігіне ие болды.

Кәсіпкерлермен ашық диалог барысында шетелдік бизнесмендер Өзбекстанда бизнес ашу және жүргізу туралы сұрақтарына толық әрі нақты жауаптар алды.