Ташкент қаласында Өзбекстан мен Әзербайжан сыртқы істер министрліктері арасындағы саяси консультациялардың кезекті раунды өтті.

Сыртқы істер министрлігінің хабарлауынша, келіссөздер барысында екіжақты қарым-қатынастың күн тәртібі жан-жақты талқыланып, жоғары деңгейде қол жеткізілген уағдаластықтарды жүзеге асыру барысы, алдағы іс-шаралар кестесі қарастырылған.

«Сауда-экономикалық, инвестициялық және мәдени-гуманитарлық салалардағы бірлескен жобаларды жүзеге асыруды қамтамасыз ету үшін сыртқы саяси ведомстволардың тығыз ынтымақтастығын жалғастыру қажеттігі баса айтылды.

Барлық салаларда дамып келе жатқан қарым-қатынастарды ескере отырып, қарым-қатынастардың шарттық-құқықтық негіздерін одан әрі кеңейтудің маңыздылығы айтылды», делінген хабарламада.

Көпжақты құрылымдар, ең алдымен Біріккен Ұлттар Ұйымы мен Түркі мемлекеттері ұйымы аясындағы өзара ынтымақтастықты нығайтуға ерекше назар аударылған.

Тараптар сондай-ақ өзекті халықаралық және өңірлік мәселелер бойынша пікір алмасқан.