Бүгін Ташкент қаласында Инвестициялар, өнеркәсіп және сауда министрлігі мен Финляндияның Шығыс сауда палатасы (EastCham Finland) бірлесіп ұйымдастырған Өзбекстан – Финляндия бизнес-форумы өтті.

Іс-шараға Финляндия Республикасының Президенті Александр Стубб, Өзбекстан Республикасының Премьер-министрінің орынбасары Жамшид Худжаев, тиісті министрліктер мен ведомстволар басшылары, сондай-ақ екі елдің 100-ден астам компаниясының өкілдері қатысты.

Сауда-экономикалық, инвестициялық және өнеркәсіп салаларындағы ынтымақтастықты кеңейту мәселелерін талқылауға арналған бұл маңызды алаң барысында тараптар өзара сауда көлемінің айтарлықтай артқанын атап өтті. Кейінгі жеті жыл ішінде тауар айналымы бес еседен астам өскен. Сондай-ақ, Еуропалық Одақпен Кеңейтілген серіктестік және ынтымақтастық туралы келісімге қол қойылуы Өзбекстан мен Финляндия арасындағы әріптестікті ЕО кеңістігінде дамыту үшін жаңа мүмкіндіктер ашатыны айтылды.

Премьер-министрдің орынбасары Жамшид Худжаев өз сөзінде Өзбекстанда инвесторлар үшін қолайлы жағдай жасау және экономиканың бәсекеге қабілеттілігін арттыруға бағытталған жүйелі реформалар туралы жан-жақты ақпарат берді. Әсіресе сирек кездесетін минералдар, «жасыл» энергетика, цифрландыру, өнеркәсіптік құрылыс және азық-түлік өнеркәсібі салаларындағы бірлескен жобаларға айрықша көңіл бөлініп жатқаны атап өтілді.

Форум қорытындысында ынтымақтастықтың бағыттарын қамтитын 14 құжатқа қол қойылды. Бұл келісімдер ауыл шаруашылығы және агроөнеркәсіп кешені, ауыл шаруашылығы өнімдерін қайта өңдеу, кен өндіру және геология, экология мен қалдықтарды басқару, су ресурстары, энергетика, фармацевтика, құрылыс, туризм және инновациялық технологияларды енгізу салаларын қамтиды. Қол қойылған құжаттар Өзбекстан мен Финляндия арасындағы экономикалық серіктестікті нығайтуға және өзара байланыстардың тұрақты дамуына қызмет ететін бірлескен инвестициялық және инновациялық жобаларды жүзеге асыру үшін берік негіз қалайды.

суреттерді түсірген Р.Назарматов, ӨзА