Ташкенттегі «Узекспомарказда» «Aviation & Logistics Forum 2023» халықаралық авиациялық форумы өтті.

Туризм комитетінің хабарлауынша, бұл шара Өзбекстанның көлік министрлігімен бірлесіп ұйымдастырылған.

«Aviation & Logistics Forum 2023» жұмысына 20-дан астам елден көлік саласындағы 40-тан астам жетекші компания – «Turkish Airlines», «Boeing», «Uzairways», «TAV Technologies» өкілдері қатысты.

Конференцияда елдер арасындағы туризм және көлік коммуникациялары саласындағы ынтымақтастықты кеңейту, аймақтағы қолданыстағы көлік дәліздерін дамыту, оларды тиімді пайдалану және жаңа перспективалар құру, Өзбекстан мен шетелдік әріптестер арасындағы халықаралық ынтымақтастықты кеңейту мәселелері талқыланды.

– Өзбекстанда жүзеге асырылып жатқан реформалардың арқасында елге келетін шетелдік туристер саны артып, 2023 жылдың соңына қарай олардың саны 7 миллионнан асады деп күтілуде. Республикада транзиттің тәртібі мен мерзімі айтарлықтай жеңілдетілді. Әлемнің 47 елінен келген жолаушылар елде 5 күнге дейін болып, маршруттар бойынша туристік орындарға барып, сапарын жалғастыра алады, – деді туризм комитеті төрағасының бірінші орынбасары Джамшид Абдусаломов.