Ташкент қаласында Ташкент технологиялар техникалық университетінің салтанатты ашылу рәсімі өтті.

Айтулы шараға Өзбекстан Республикасының энергетика министрі Журабек Мирзамахмудов, экономика және қаржы министрінің орынбасары Отабек Фозилкаримов, сондай-ақ халықаралық серіктестер — «Constructor University Bremen» (Германия) университеті мен «Boston Consulting Group» (АҚШ) халықаралық консалтингтік ұйымының өкілдері, өнеркәсіп және энергетика салаларындағы жетекші компаниялардың басшылары қатысты.

Өзбекстан Республикасы Президентінің 2025 жылғы 8 қыркүйектегі «Ташкент қаласында «TаshTech» техникалық университетін ашу туралы» қаулысына сәйкес, халықаралық стандарттарға негізделген жаңа буын техникалық жоғары оқу орны — «TаshTech» техникалық университеті (Tashkent University of Technology) ашылды. Университет Орталық Азияда инженер кадрларды даярлау бойынша жетекші академиялық және технологиялық орталыққа айналуы көзделіп отыр.

«TаshTech» Өзбекстанның жоғары білім жүйесіндегі флагман ұлттық жоба болып саналады және академиялық жетілдіру, қолданбалы зерттеулер мен өнеркәсіппен жүйелі интеграцияға негізделген инженерлік университеттің жаңа моделін қалыптастыруда. Университет STEM бағыттары, технологиялық кәсіпкерлік, білім мен технологиялар трансфері үшін институционалдық платформа ретінде қызмет атқарады.

Университетте оқу процесі бакалавриат және магистратура бойынша инженерлік және технологиялық бағыттарда өзбек, орыс және ағылшын тілдерінде ұйымдастырылады. Алғашқы төрт жылда электр инженериясы, өнеркәсіптік машина жасау және автомобиль инженериясы, материалтану және инженерлік ғылымдар, озық инженерия және жаңа технологиялар, сондай-ақ инженерлік менеджмент бағыттары бойынша бес мектеп (факультет) ашу жоспарланған.

Университеттің дайындық бағдарламасы (Foundation) Германиядағы «Constructor University Bremen» университетінің академиялық қатысуымен әзірленіп, инженерлік білім берудің халықаралық стандарттарына толық сәйкес келеді. Бұл ынтымақтастық оқу бағдарламаларының сапасын арттыруға, бағалау мен академиялық бақылау тетіктерін жетілдіруге, профессор-оқытушылар құрамын даярлауға және академиялық алмасуды қамтамасыз етуге бағытталған.

Сонымен қатар университет Сингапур, Ұлыбритания және АҚШ-тың жетекші жоғары оқу орындарымен бірлесіп бакалавриат және магистратура бағдарламаларын енгізуді жоспарлап отыр.

«TаshTech» техникалық университетінің даму тұжырымдамасы, институционалдық моделі және білім беру бағдарламаларының стратегиялық архитектурасы «Boston Consulting Group» (BCG) халықаралық консалтингтік ұйымы сарапшыларының қолдауымен әзірленді. BCG университеттің басқару моделін қалыптастыруға, өнеркәсіппен интеграцияға, құзырет орталықтарын және цифрлық білім беру инфрақұрылымын дамытуға көмектесіп жатыр.

Ашылу рәсімі аясында «TаshTech» техникалық университеті мен бірқатар ірі салалық ұйымдар арасында ынтымақтастық туралы меморандумға қол қойылды. Олардың қатарында «Өзбекстан технологиялық металдар комбинаты» АҚ, «ACWA Power», «Жылу электр станциялары» АҚ, «Жасыл энергия» ЖШС, «Өңірлік электр желілері» АҚ, «Өзбекстан ұлттық электр желілері» АҚ және «Узенергоинжиниринг» АҚ бар. Бұл серіктестік аясында студенттерге тәжірибе, тағылымдама ұйымдастыру, бірлескен жобалар іске асыру және оқу бітіргеннен кейін жұмысқа орналастыру тетіктерін жолға қою жоспарланған.

Экономика және қаржы министрлігі баспасөз қызметінің мәліметінше, технологиялық трансформация мен өнеркәсіпті жаңғырту үдерістері жеделдеп жатқан жағдайда Өзбекстан экономикасында жоғары білікті инженер кадрларға сұраныс артып келеді. Жұмыс тобының болжамына сәйкес, алдағы он жылда елдің негізгі салаларында шамамен 35 мың инженер маманға қажеттілік туындайды. «TаshTech» университеті дәл осы сұранысты қамтамасыз етуге, энергетика, өнеркәсіп, машина жасау және жоғары технологиялы өндірістер үшін заманауи инженерлерді даярлауға бағытталған.

Университет қызметін 2026 жылғы қыркүйек айында толық бастау үшін қажетті инфрақұрылым қалыптастырылған. Атап айтқанда, 2025 жылғы желтоқсанда кампустың бірінші кезеңі пайдалануға берілді. Университет ғимаратында энергия үнемдейтін технологиялар қолданылып, үш қабатты екі камералы терезелер, сыртқы қабырғаларға базальтты жылу оқшаулауы, жылыту мен салқындату жүйесінде жылу сорғылары мен фанкойлдар орнатылды. Сондай-ақ электр энергиясына деген қажеттіліктің бір бөлігі жаңартылатын күн панельдері арқылы қамтамасыз етіледі. Қазіргі таңда 4 мың шаршы метрден астам аумақ қуаты 120 киловатт болатын күн панельдері арқылы жылыту және салқындату жүйесіне қосылған.

Дайындық бағдарламасына алғашқы қабылдау барысында 650-ден астам өтініш түсіп, олардың ішінен 200 тыңдаушы іріктеліп алынды. Алғашқы сабақ пен ашық дәріс 2025 жылғы 20 желтоқсанда өткен.

Осылайша, «TаshTech» техникалық университетінің ашылуы Өзбекстанда инженерлік білім беруді жаңа деңгейге көтеруге, ғылыми-зерттеу мен өндіріс арасындағы өзара байланысты нығайтуға қызмет етеді. Университет қызметінің нәтижесінде экономиканың стратегиялық салалары үшін бәсекеге қабілетті, заманауи білім мен дағдыларға ие мамандарды даярлауға ықпал етеді.