Өзбекстан, Қырғызстан және Қазақстан энергетика министрлері мен Дүниежүзілік банк өкілдері Қамбарата ГЭС-1 құрылысын жүзеге асыру мәселесін талқылау мақсатында Ташкент қаласында бас қосты.

Өзбекстан Республикасының энергетика министрі Журабек Мирзамаһмудовтың айтуынша, бұл жоба Орталық Азияның барлық елдеріне орасан пайда әкеліп, «жасыл» экономика идеяларын ілгерілету және су ресурстарын тиімді пайдалану арқылы өңірлік энергетикалық қауіпсіздікті нығайтады.

Қырғызстан энергетика министрі Таалайбек Қамбарата 1 ГЭС-інің халықаралық қаржы институттары мен даму серіктестерінің үлкен қызығушылығын тудырғанын айтып, бұл жоба өңірлік серіктестікті нығайту және Орталық Азияның ұзақ мерзімді дамуына көмек көрсету тұрғысынан маңызды екенін атап өтті. 

«Ташкенттегі кездесу 2024 жылы Вена, Брюссель және Вашингтонда өткен кездесулердің жалғасы болды, ол жобаны жеделдету және халықаралық қолдау тартуға септігін тигізеді», - деген ол.

Қазақстан энергетика министрінің орынбасары Сұңғат Есімханов су-энергетика саласындағы ынтымақтастықтың күшейіп келе жатқанын және бұл өңірде ұзақ мерзімді тұрақтылықты қамтамасыз ету үшін маңызды екенін айтты. 

Сонымен қатар, Дүниежүзілік банктің Орталық Азия бойынша өңірлік директоры Татьяна Проскурякова Қамбарата ГЭС-1 жобасын жүзеге асыру үшін қажетті қаржыны іздеуде халықаралық серіктестермен бірлесіп жұмыс істеп жатқанын жеткізді.

Кездесу барысында тараптар жобаны бірлесіп әзірлеу және жүзеге асыру жөнінде негізгі принциптер бойынша келісімге келді. Жоспарлар бекітіліп, практикалық қадамдарды үйлестіру, ынтымақтастықты нығайту және тұрақты дамуды қамтамасыз ету мақсатында министрлер деңгейінде, сондай-ақ халықаралық донорлар қатысуымен тұрақты түрде кездесулер өткізу қажеттілігі айқындалды.