2025 жылдың 10–12 маусымы аралығында Өзбекстан тағы да әлемдік инвесторлардың назарында болмақ – ел астанасы Ташкентте IV Халықаралық инвестициялық форум өтеді.

Бұл шара бірнеше жылдан бері инвестициялық әлеует пен экономикалық ынтымақтастықты талқылауға арналған маңызды халықаралық алаңға айналды. Биылғы форумның маңызы ерекше, себебі Өзбекстан бүгінде Орталық Азияда қарқынды дамып келе жатқан мемлекет ретінде өз орнын нықтап келеді.

Осыған байланысты Өзбекстанның Инвестициялар, өнеркәсіп және сауда министрі Лазиз Қудратов шетелдік басылымдарға берген сұхбатында соңғы жеті жылда елде жүзеге асырылған кең ауқымды реформалар мен инвесторлар үшін жасалған қолайлы жағдайларды атап өтті. Оның айтуынша, қысқа мерзім ішінде елге 90 миллиард доллардан астам шетелдік инвестиция тартылған. Бұл – аймақ көлеміндегі ең ірі көрсеткіштердің бірі. Мысалы, тек өткен жылы Өзбекстан экономикасы 6 пайызға өскен, бұл елдің даму бағытының дұрыстығын дәлелдейді.

«Өзбекстан – 2030» стратегиясы аясында елдің жалпы ішкі өнімін 200 миллиард долларға дейін жеткізу жоспарланып отыр. Бұл тек қағаз жүзіндегі бастама емес – нақты жобалармен бекітілген, ал шетелдік инвестициялар бұл үдерістің негізгі қозғаушы күшіне айналмақ. Осы тұрғыда Ташкент халықаралық форумы мемлекет пен бизнес арасындағы тиімді диалог алаңына айналып отыр. Мысалы, өткен, яғни үшінші форумда рекордтық көлемде – 26,6 миллиард долларлық келісімдерге қол қойылған болатын.

2022 жылдан бері қол қойылған инвестициялық келісімдердің жалпы көлемі 44 миллиард доллардан асты. Бұл жобалардың басым бөлігі қазіргі таңда жүзеге асырылуда немесе құрылыс сатысында. Ең белсенді инвесторлар қатарында Сауд Арабиясы, Қытай, Ресей және технологиясы мен тәжірибесі әртүрлі басқа мемлекеттер бар.

Бүгінде Өзбекстан өз есігін әлемге айқара ашып, шетелдік серіктестерді машина жасау, автокөлік өндірісі, электр энергетикасы, қаржылық технологиялар және тіпті жасанды интеллект салаларындағы бірлескен жобаларға қатысуға шақыруда. Алдағы форумның тағы бір жаңалығы – алғаш рет арнайы инвестициялық көрме түрінде ұйымдастырылуы. Бұл – ірі компанияларға өз жобаларын ұсынуға, ал жергілікті кәсіпкерлерге халықаралық аудитория алдында өз әлеуетін таныстыруға берілетін үлкен мүмкіндік.