Ташкент қаласында 5, 7 және 8 шілдеде соңғы 150 жылдағы ең ыстық ауа температурасының рекордты деңгейі жаңарды.

«Узгидрометтің» хабарлауынша, Өзбекстан астанасында ауа температурасы 150 жыл бойы үнемі бақылауда. Климаттың өзгеруі нәтижесінде ғаламдық жылыну үдетті. Бұл түнде де температураның көтерілуінен айқын көрінеді.

Түнгі температураның жоғарылауы жылу мен басқа ластаушы заттардың ауаға көп шығарылуынан, яғни парниктік эффект процесінде туындайды. Парниктік эффект жаһандық жылынуды тудырады және күн бойы ауа температурасының максималды және минималды мәндері арасындағы айырмашылықты азайтады. Бұл өз кезегінде ауаның орташа тәуліктік температурасының жоғарылауына әкеледі.

1 шілдеде Узгидромет 3-8 шілде күндері Өзбекстандағы ауаның орташа тәуліктік температурасы ұзақ мерзімді климаттық нормадан 5-8 градусқа асуы жайлы ескертті.

Шілде айының басында Ташкенттегі ауаның тәуліктік температурасы бұрынғы рекордтық көрсеткіштер тіркелген сол күнгі орташа тәуліктік температурадан едәуір жоғары болғандығы айтылды. Тәуліктік максималды мәндермен бірге ауаның орташа тәуліктік температурасы да жоғарылауда.

Атап айтқанда, 1881 жылы 6 шілдеде Ташкентте осы күннің абсолютті рекорды орнаған (+44,1 градус). Алайда, сол кезде ауаның орташа тәуліктік температурасы әлдеқайда төмен болды (+28,1 градус). 2021 жылы 6 шілдеде ауаның максималды тәуліктік температурасы рекордтық көрсеткіштен (+41,5 градус) әлдеқайда төмен болғанымен, ауаның орташа тәуліктік температурасы 1881 жылғы ауаның орташа тәуліктік температурасынан шамамен 5,5 градусқа жоғары байқалды.

2021 жылдың маусым айында республика аймақтарында ауаның орташа айлық температурасы ұзақ мерзімді климаттық нормадан 1-3 градус жоғары болды, делінген хабарламада.