Ташкент халықаралық әуежайының ұшып кету залында 120 жолаушыға арналған жаңа бизнес-зал ашылды. Ашылу рәсімінде әуежай директоры Жасур Полатов өткен жылғы нәтижелермен бөлісті.

Жалпы аумағы 427 шаршы метр болатын бұл залда жолаушыларға Wi-Fi, душ кабиналары және әртүрлі тағамдар ұсынылады. Зал тәулік бойы жұмыс істейді және жолаушыларға рейстерін күткен кезде жайлы уақыт өткізу мүмкіндігін береді.

– Бүгінде барлық салада үлкен реформалар жүргізілуде, – дейді Ташкент халықаралық әуежайының директоры Жасур Полатов. – Президентіміздің бастамасымен халықаралық бағыттар бойынша келіп-кететін жолаушыларға көрсетілетін қызмет сапасын арттыру үшін бірқатар шаралар қолға алынды. Атап айтқанда, реконструкция аясында әуежай терминалы кеңейтілді, вокзал алдындағы алаң абаттандырылды. Мемлекет басшысы атап өткендей, әуежай – Өзбекстанның қақпасы. Сондықтан мұнда қонақтар үшін барлық жағдай жасалуы тиіс. Заманауи инфрақұрылым мен кең мүмкіндіктердің арқасында 2024 жылы әуежай 9 миллионнан астам жолаушыға қызмет көрсетті. Жолаушылар ағынының артуына байланысты бизнес-залдарға да сұраныс көбейіп келеді.

Жаңа бизнес-залды басқару Әзірбайжанның Гейдар Әлиев атындағы Баку халықаралық әуежайы мен Гянджа халықаралық әуежайында жолаушыларға қызмет көрсету бойынша 10 жылдан астам тәжірибесі бар компанияға тапсырылды.

Айта кету керек, соңғы жылдары Ислам Каримов атындағы Ташкент халықаралық әуежайы жаңғыртылып, жолаушылар үшін жағдай жақсарды. Қызмет түрлері кеңейтіліп, тіркеу орындары мен ұшаққа шығу өткелдері көбейтілді. Жалпы, үш жылға созылған қайта құру жұмыстарының нәтижесінде әуежайдың ұшу терминалының аумағы 56 мың шаршы метрден 80 мың шаршы метрге дейін кеңейтілді.