Біріккен Араб Әмірліктері мен Өзбекстан бірлесіп VIP және CIP клиенттеріне қызмет көрсету бойынша жаңа инвестициялық жоба жүзеге асырылатын болады.

ӨР Көлік министрі Ильхом Махкамов пен JETEX компаниясының негізін қалаушы Адель Мардини арасында азаматтық авиация саласындағы перспективті жобаларды іске асыру бойынша ынтымақтастық меморандумы бекітілді. 

Бұл меморандум аясында «Ташкент-Шығыс» әуежайында FBO түрінде мемлекеттік-жекешелік әріптестік негізінде VIP және CIP клиенттеріне қызмет көрсету ұйымдастырылады.

Жоба аясында шағын авиация саласында техникалық қызметтер, жөндеу, сату және сақтау жұмыстары қолға алынып, ерекше ұсыныс ретінде VIP такси қызметі енгізіледі. Бұл қадам туристік салаға оң әсер етіп, VIP клиенттер үшін ерекше ыңғайлылықтар мен қызмет көрсету деңгейін арттырады. Сонымен қатар, бизнес авиация саласында 200-ден астам жоғары білікті жұмыс орындары ашылып, ел экономикасына қосымша үлес қосылады.

JETEX компаниясы 2005 жылы құрылған және бүгінде 5 құрлықта 30 бизнес бірлестігімен ғаламдық желіні қалыптастырған. Компания әлемнің әр түкпірінде, оның ішінде Таяу Шығыс, Еуропа, Азия-Тынық мұхиты аймағы, Африка және Америкада 50-ден астам жерде тәулік бойы қызмет көрсетеді.

FBO (Fixed Base Operator) – бұл әуежайларда әуе кемелеріне және жолаушыларға кешенді қызметтер көрсететін ұйым. Оған әуе кемелеріне отын құю, тоқтау орындары, ангарларда сақтау, техникалық және жөндеу қызметтері, әуе кемелерін жалға беру, чартерлерді сату, такси және басқа да қызмет түрлері кіреді.