Ташкент әуежайында 1,8 млрд сумдық гауһар тастарды заңсыз өткізбек болғандар ұсталды
Ташкент халықаралық әуежайында Делиден ұшқан жолаушының пальтосының қалтасынан 281 караттық гауһар тас табылды.
Алдын ала болжам бойынша, Ташкент халықаралық әуежайының шекара-кеден бекетінің қызметкерлері анықтаған бұл жағдайда жолаушы кедендік бақылауға бермеген гауһар тастардың жалпы құны 873 миллион сумнан асады.
Үндістаннан келген тағы бір жолаушының багажын тексеру барысында бұл шетелдік азаматтың да әртүрлі көлемдегі 57 дана гауһар тасты заңсыз алып өтпек болғаны анықталды.
Кедендік бақылауға көрсетпеуге тырысқан асыл тастардың құны шамамен 942 миллион сумнан асады.
Естеріңізге сала кетейік, Өзбекстан кеденшілері 2023 жылы анықталған 394 кедендік құқық бұзушылық фактілері бойынша жалпы құны 32,4 миллиард сумды құрайтын 163 келі зергерлік бұйымдар мен асыл тастарды кедендік шекара арқылы заңсыз өткізудің жолын кесті.