Өзбекстан мен Қазақстан арасындағы туристік әрі гуманитарлық байланыстарды тереңдете түсуге бағытталған тағы бір маңызды бастама жүзеге асқалы отыр. Таяу уақытта Ташкент пен Атырау қалаларын жалғайтын жаңа тікелей тұрақты әуе рейсі ашылады.

«Dunyo» ақпарат агенттігінің хабарлауынша, Атырау қаласында Өзбекстан Республикасының Бас консулдығының дипломаттары, Uzbekistan Airways әуекомпаниясының өкілі және Атырау облысы әкімінің орынбасары Қайрат Нұртаев қатысқан кездесу өтті.

Келіссөз барысында тараптар Ташкент – Атырау бағыты бойынша жаңа тұрақты әуе рейсін іске қосу жөнінде ортақ келісімге келді.

Жиынға сондай-ақ облыстың жолаушылар тасымалы, туризм және инвестициялар салаларына жауапты басқармаларының өкілдері қатысып, азаматтық авиация саласындағы екіжақты ынтымақтастықты кеңейту мүмкіндіктерін талқылады.

Кездесу барысында Өзбекстан өңірлері мен Атырау облысы арасындағы тікелей әуе қатынасының жолға қойылуы екі ел арасындағы туристік, мәдени және іскерлік байланыстарға тың серпін беретіні ерекше атап өтілді. Сонымен қатар, жергілікті атқарушы билік өкілдері жаңа әуе рейсін ашуға байланысты барлық ұйымдастырушылық мәселелерді шешуге және жобаны іс жүзінде жүзеге асыруға жан-жақты қолдау көрсетуге дайын екендерін білдірді.

Келіссөздер қорытындысында Ташкент – Атырау бағыты бойынша тұрақты әуе рейсін ашу, сондай-ақ Өзбекстан мен Қазақстан арасындағы туристік және гуманитарлық ынтымақтастықты дамытуға бағытталған бірлескен іс-шараларды ұйымдастыру жөнінде нақты уағдаластыққа қол жеткізілді.

Жаңа әуе бағыты аймақтар арасындағы жолаушылар ағынын арттырып қана қоймай, іскерлік байланыстар мен инвестициялық жобалардың дамуына да оң әсерін тигізеді. Сарапшылардың пікірінше, бұл бастама екі елдің шекаралас өңірлері арасындағы өзара ықпалдастықты жаңа деңгейге көтеруге мүмкіндік береді.