Нукусда Ўзбекистон Республикаси Президенти соврини учун «Ташаббус – 2021» кўрик-танловининг Қорақалпоғистон Республикаси босқичидан кимлар иштирок этиши маълум бўлди.

Танловда ҳудудларда кичик бизнес ва хусусий тадбиркорлик жадал ривожланишини рағбатлантирувчи бизнес муҳитини яратиш, мамлакат иқтисодиётида хусусий секторнинг улуши ва аҳамиятини ошириш, тадбиркорлар ўртасида хўжалик алоқаларини кенгайтириш мақсадида ҳар йили анъанавий тарзда ўтказиб келинаётган танлов иштирокчиларининг, шу жумладан, тадбиркорлик билан шуғулланувчи хотин-қизлар ва ёшлар сафи йилдан-йилга ортиб бораётгани қайд этилди. Мана шундай саъй-ҳаракатлар натижасида Оролбўйида кичик бизнеснинг ялпи ички маҳсулот ишлаб чиқаришдаги улуши 2020 йил якунида 54,3 фоиз, саноатда 104,1 фоиз, хизматлар соҳасида 33,6 фоизни ташкил этди.

Шаҳар ва туманлар босқичида ғолиб бўлган жами 84 нафар тадбиркор, фермер ва ҳунарманд “Саноат соҳасида йилнинг энг яхши тадбиркори”, “Хизмат кўрсатиш соҳасида йилнинг энг яхши тадбиркори”, “Йилнинг энг яхши ёш тадбиркори”, “Йилнинг энг яхши фермери”, “Йилнинг энг яхши ҳунарманди” йўналишларида иштирок этди.

Танлов якунида “Саноат соҳасида йилнинг энг яхши тадбиркори” йўналиши бўйича “To'rtko'l shisha idishlari”масъулияти чекланган жамияти раиси Хуршид Юлдашев, “Хизмат кўрсатиш соҳасида йилнинг энг яхши тадбиркори” йўналиши бўйича “Muinak tour” масъулияти чекланган жамияти раиси Амина Бекжанова, “Йилнинг энг яхши ёш тадбиркори” йўналиши бўйича “Ecoline root” масъулияти чекланган жамияти раиси Мансур Низаматдинов, “Йилнинг энг яхши фермери” йўналиши бўйича “Panaev farms” фермер хўжалиги раҳбари Тимур Панаев, “Йилнинг энг яхши ҳунарманди” йўналиши бўйича якка тартибдаги тадбиркор Ибрайим Жолимбетов биринчи ўринни эгаллади.

Шунингдек, «Маҳалланинг ривожига энг кўп ҳисса қўшган тадбиркор», «Энг яхши оилавий бизнес соҳиби», «Энг яхши «Start-Up» лойиҳа», «Энг яхши инвестицион лойиҳа», «Энг яхши экспортчи», «Ёшларга энг кўп иш жойи яратган тадбиркор», «Интернет технологиялари (IT) соҳасидаги энг яхши тадбиркор», «Устоз-шогирд» мактабини ташкиллаштирган энг яхши ҳунарманд», «Туризм соҳаси ривожига қўшган ҳиссаси учун», «Энг яхши тадбиркорлик кластери» каби бир қатор номинациялар бўйича ғолиблар аниқланди.

Танлов ғолибларига ташкилотчилар томонидан диплом ва қимматбаҳо совғалар топширилди. Биринчи ўринни эгаллаганлар «Ташаббус – 2021» кўрик-танловининг Ўзбекистон Республикаси босқичида иштирок этади.  

Довуд Абибуллаев,  

Досан Абдраманов (сурат), ЎзА