Бугун, 3 февраль куни Нидерландиянинг Вейк-ан-Зее шаҳрида ўтган “Tata Steel Chess–2026” турниридан юртимизга қайтиб келган Нодирбек Абдусатторов ва Жавоҳир Синдоров Германияда яқин кунларда “Freestyle Chess” бўйича жаҳон чемпионатида иштирок этиш учун ушбу мамлакатга йўл олади.

Маълумки, “Tata SteelChess–2026” турнирининг 17 кунлик шиддатли баҳслари якунларига кўра, “Мастерс”гуруҳида Нодирбек Абдусатторов 9 очко билан ғолибликни қўлга киритди. Жавоҳир Синдоров эса 8,5 очко жамғариб, 14 нафар энг кучли шахматчи орасида 2-ўринни эгаллади. Бу натижалар Ўзбекистон шахмати тарихидаги навбатдаги ёрқин саҳифа бўлди. 88-маротаба ташкил этилган, дунёдаги энг нуфузли шахмат мусобақаларидан бири ҳисобланган мазкур турнирда чемпионлик унвонини қўлга киритган Нодирбек Абдусатторов ўз ғалабаси билан жаҳон шахматининг гигантлари сафида Ўзбекистон номини зарҳал ҳарфлар билан муҳрлади.

Жаҳон шахмат ишқибозларига “ақл гимнастикаси”нинг бетакрор завқини улашган гроссмейстерларимиз Нодирбек Абдусатторов ва Жавоҳир Синдоров Ислом Каримов номидаги “Тошкент” халқаро аэропортида кутиб олинди. Ушбу жараёнда улар журналистларни қизиқтирган қатор саволларга жавоб беришди.

Хўш, “Tata SteelChess–2026” мусобақаларида ҳар икки шахматчимиз учун энг қийин ва энг қизиқарли партия қайси бўлди? Ҳамюртларимиз яқин кунларда қайси мусобақаларда иштирок этади?  

Жавоҳир Синдоров Даъвогарлар турнирига қайси мураббий ва мутахассислар билан тайёргарлик кўраётгани нима сабабдан сир сақланмоқда?  

Нодирбек Абдусатторов учун жорий йилдаги энг муҳим мусобақа қачон бўлиб ўтади?

Шахматчиларимизнинг Нидерландиядаги мусобақа таассуротлари ҳамда ушбу саволларга жавоблари билан қуйидаги ҳавола орқали танишишингиз мумкин.

<iframe width="640" height="420" src="https://www.youtube.com/embed/u9jFvTYwXpY" title="Tarixiy g`alabadan keyin yangi chaqiriq: Nodirbek va Javohir Germaniyaga yo`l oladi " frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Т. Рўзиев, О. Давронов (видео), А. Аҳмедов (монтаж), ЎзА