2021 йил 25 август куни Ўзбекистон тарихида ўзига хос воқийлик билан ёдга олинади.

Айнан шу куни 115 нафар ватанпарварларимиз Ўзбекистон Республикаси Олий суди томонидан оқланди.

Тарихдан маълумки, Ватан озодлиги ва эрки учун жонларини фидо қилган қанчадан-қанча ота-боболаримиз собиқ Шўролар даврида зиндонларга ташланган, қатл этилган, ва сургун қилинган. Буларнинг барчасига уч нафар шахс бир парча қоғоз билан ҳукм чиқариб ташлаверган.

Уларга ҳукм чиқаришда ҳеч бир ҳуқуқий қонунга амал қилинмаган. Қораланувчиларга ҳимоячи, таржимон берилмаган. Жиноят ишларини ўрганиш жараёнида уюштирилган сохта далил ва гувоҳлардан фойдаланилганлиги аниқланган.

<iframe width="650" height="420" src="https://www.youtube.com/embed/gnQ6IqYiHSs" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture" allowfullscreen></iframe>

Шулардан 115 нафар шахсга оид 6 та жиноят иши Олий суд томонидан кўриб чиқилиб барчасига қўйилган тамға олиб ташланди. Энди ушбу ватанпарварларимиз қонуний тарафдан ҳам оқланди.

Энди уларнинг азобли ва оғир ҳаётини акс эттирган ватанпарварлик руҳидаги тарихий киноларни тасвирга олса ҳам бўлади.

Суд жараёнида Тошкент вилояти Қибрай туманида туғилиб яшаган Ғофур Султоновга оид жиноят иши ҳам кўриб чиқилди.

Ғофур Султонов 1930 йил 27 октябрда Марказий Осиё Бирлашган давлат сиёсий бошқармаси (БДСБ) Мухтор вакили қошидаги Учлик кенгаши қарори билан отувга ҳукм қилинган.

Орадан 91 йил ўтиб Ғофур Султонов оқланиши ҳақидаги Олий суд ҳукмини эвараси Ғофуров Ғофур хурсандчилик кўз ёшлари билан тингламоқда.

Ш. ОТАБОЕВ, Н. АБДУВОИТОВ (видео), ЎзА