Пойтахтимиздаги Ёшлар-пресс клубида Ўзбекистон ёшлар иттифоқи ҳузуридаги “Yoshlar – kelajagimiz” жамғармаси, “Alibaba Group”, “China Campus Network Uzbekistan” компаниялари ҳамкорлигида Ўзбекистонда электрон бизнес истиқболларига бағишланган онлайн форум бўлиб ўтди.

Унда депутатлар, “Yoshlar – kelajagimiz” жамғармаси, Солиқ ва Божхона қўмиталари мутахассислари, ёш тадбиркорлар иштирок этди.

– Форум ёш тадбиркорлар фаолиятини қўллаб-қувватлаш, уларнинг маҳсулотларини сотишга кўмаклашиш, электрон бизнеснинг иқтисодиётдаги аҳамияти, уни ривожлантириш каби масалалардан ёш тадбиркорларни хабардор қилиш мақсадида ташкил этилди, – деди Ўзбекистон ёшлар иттифоқи марказий кенгаши раиси Алишер Саъдуллаев. – Пандемия даврида дунёда онлайн бизнесга бўлган талаб жуда ошди. 

Маҳсулотни етказиб бериш хизматига бўлган қизиқиш кучайди. Кўпчилик онлайн платформага кириш истагини билдирмоқда. Бу орқали бир вақтнинг ўзида бир нечта иш билан банд бўлиш мумкин. Ўз навбатида, бу даромадни кўпайтиради. Табиийки билимга чанқоқ ёшлар шу соҳа вакилларидан маслаҳат олишни истайди. Тан олишмиз керак, бугунги ёшлар глобал дунёга тайёр эмас. Уларга замонавий фикрлашни ўргатишимиз керак.

“Yoshlar – kelajagimiz” жамғармаси ижрочи директори Хайрулла Сатторов ёш тадбиркорлар билан электрон бизнесга доир кўникмаларини ўртоқлашди. Дастлаб иш бошлаганда юзага келадиган тўсиқларни санаб ўтиб, уларга ечимлар таклиф қилди.

Таъкидланишича, бугунга қадар “Yoshlar – kelajagimiz” давлат дастури доирасида ахборот-коммуникация технологиялари йўналишидаги 271 лойиҳа учун маблағ ажратилган. Лойиҳанинг барчаси амалиётга татбиқ этилган бўлиб, шу орқали мингга яқин ёшлар бандлиги таъминланган.

“China Campus Network Uzbekistan” компанияси маркетинг бўйича директори Одилбек Худойбердиев электрон бизнеснинг пайдо бўлиши ва ривожланиш босқичлари, унинг анъанавий бизнесга нисбатан устунлиги, иқтисодиётга қўшаётган ҳиссаси ҳақида сўзлаб берди.

– Электрон бизнес рақобатни ривожлантиради. Бунда кичик ва ўрта тадбиркорликка эътибор қаратиш керак. Уларга ёрдам бериш орқали давлат иқтисодиётини ривожлантириш мумкин. Электрон бизнеснинг яхши томонларидан бири – кичик сармоя билан катта натижаларга эришиш мумкин. Муҳими амалий ҳаракатни бошлаш керак.

Форумда электрон бизнес билан шуғулланаётган тадбиркорларга яратилган енгилликлар ҳақида ахборот берди.

Таъкидланганидек, чакана савдо ҳажмининг асосий қисмини мобил электрон тижорат (mCommerce) ташкил қилади. Дунёда mCommerce орқали амалга оширилган харидлар 2016 йилда 0,97 триллион АҚШ доллари, 2018 йилда 1,80 триллион АҚШ доллари, 2019 йилда 2,32 триллион АҚШ долларини ташкил қилган. Ушбу кўрсаткич 2020 йилда 2,91 триллион АҚШ долларига АҚШ долларига етиши кутилмоқда. Интернет орқали харидлар сони бўйича 38-53 ёшлилар кўпчиликни ташкил қилади.