Мажлисни бошқараётган Сенат раиси Танзила Норбоева кириш сўзида жамиятда учраётган муаммоларни ҳал қилишда сенаторлардан фаоллик талаб қилиниши бўйича сўз юритди.

Бунинг учун жойларда иш олиб бориш учун маҳаллий кенгашлар учун зарур шарт-шароит яратилди. Кенгаш аъзоларига алоҳида хоналар ажратилди.

Энди эса амалий ишларни бажариш керак. Сенаторлар самарали фаолият олиб бориши учун уларга нафақат зарур шароит яратилмоқда, балки уларнинг салоҳиятини ошириш ишлари ҳам эътиборда.

Токи, жойлардаги кенгаш аъзолари ижро органлари олиб бораётган ишларни таҳлил қила олиш, уларнинг фаолияти устидан парламент назоратини таъминлай олиши керак.

– Айниқса, жойлардаги муаммолар ҳар биримизни қийнаши керак, – деди Сенат раиси. – Сенаторлар жойлардаги ҳал қилиш имкони бўлмаган муаммоларни Сенатга олиб чиқиши, уларни Республика даражасида ҳал этиш бўйича курашиши керак. Бу борада ҳали етарли тажриба йўқ. Лекин бундай тизим йўлга қўйилади.

Айни пайтда Сенат фаолият самарадорлигини ошириш учун жамоатчилик институтлари, оммавий ахборот воситалари вакиллари билан фаол ҳамкорлик қилмоқда. Бу жараён янада кенгайтирилади.

Қайд этилганидек, ялпи мажлисда кўриб чиқиладиган масалалар, хусусан, маъқулланиши кутилаётган қонунлар сенаторларга икки ҳафта олдин етказилгани қайд этилди. Бу жараёнда айрим сенаторлар жуда фаоллик кўрсатган. Ўз фикрлари, мулоҳазаларини билдириб борган. Бироқ, айримлари бу жараёнда умуман фаоллик кўрсатмаган.

Сенат раиси бу ҳолатни “айрим сенаторларимиз сен менга тегма, мен сенга тегмайман”, қабилида иш тутди”, деб баҳо берди.

Шу билан бирга, мажлисда фаолиятнинг биринчи ойиданоқ бу ҳол кузатилгани яхши эмаслиги, сенаторлар халқнинг жойлардаги вакиллари экан, улар фақат фаол бўлиши шартлигига урғу берилди.