Танзила Норбоева АҚШ Халқаро тараққиётни молиялаштириш корпорацияси делегацияси билан учрашди
Сенат фаолияти ва парламентда аёлларнинг ўрни, хотин-қизларнинг жамиятдаги мавқеини мустаҳкамлаш ҳамда Ўзбекистонда гендер тенглигини таъминлаш масалалари бўйича кўрилаётган чоралар борасида ҳам сўз юритилди.
АҚШ Халқаро тараққиётни молиялаштириш корпорацияси (DFC) бош ижрочи директори Адам Болер бошчилигидаги делегация билан учрашувда таъкидланганидек, Ўзбекистон ва АҚШ ўртасидаги муносабатларни, парламентлараро алоқаларни мустаҳкамлаш борасида сезиларли фаоллик кузатилмоқда. Бунда Ўзбекистон Республикаси Президентининг очиқ, конструктив ва прагматик ташқи сиёсати муҳим аҳамият касб этади.
Учрашувда Ўзбекистон – АҚШ парламент ҳамкорлик гуруҳи, АҚШ Конгрессининг «Ўзбекистон бўйича Кокус» ўртасида мулоқотни давом эттириш, демократик ислоҳотлар ва фуқаролик жамиятини шакллантириш бўйича конструктив муносабатларни янада ривожлантириш борасида фикр алмашилди. Икки томонлама муносабатларда савдо-иқтисодий, молиявий, инвестиция ва замонавий технология йўналишида ҳамкорликни кенгайтириш масалалари муҳокама қилинди. “Doing business 2020” йиллик рейтингида Ўзбекистон энг юқори кўрсаткични қайд этган йигирмата мамлакат қаторига киргани эътироф этилди.
Сенат фаолияти ва парламентда аёлларнинг ўрни, хотин-қизларнинг жамиятдаги мавқеини мустаҳкамлаш ҳамда Ўзбекистонда гендер тенглигини таъминлаш масалалари бўйича кўрилаётган чоралар борасида ҳам сўз юритилди.
Шу билан бирга, DFC билан ўзаро манфаатли ҳамкорлик йўналишлари, мажбурий меҳнатдан фойдаланишга қарши кураш масалалари ва бу борада биргаликда ишлаш истиқболларига урғу берилди. Бир қатор қўшма лойиҳаларни ишлаб чиқиш ва амалга ошириш юзасидан таклифлар билдирилди.